Vawiin chawhnu khan Police Headquarters (PHQ), Khatla ah Mizoram Police Officer te chuan  Chief Minister Pu Lal Thanhawla hovin Conference vawi 2-na an hmang a. He hunah hian Home Minister Pu R.Lalzirliana leh Lt.Col ZS Zuala (Retd.) Parliamentary Secretary pawh an tel a ni.

Police Conference vawi 2-na hman a ni thei leh ta chu lawmawm a tih thu sawiin Chief Minister Pu Lal Thanhawla chuan police te chu DAN kengkawh tu an nihna hi hrechiang nawn leh turin a chah a. "DAN leh HRAI hnuaiah mi kan inang vek - milian-mite an awm lo, rethei leh hausate pawh kan in ang tlang vek a ni. Chuvangin DAN leh HRAI kenkawh chungchanga HLEIH neih bik a thiang lo tih kan hriat nawn fo a pawimawh.Tin, DAN kan lekna lamah hian mihring chanvo dikna (HUMAN RIGHTS) zah chunga hmalak zel tur a ni', a ti.

Ram thangzelin in a ken tel case khirh tak tak a lo awm mek zel a; CYBER CRIME leh pawikhawihna thenkhat chinfel te phei chu thil awlai lo tak - Police tan chona (CHALLENGE) a a tling tawh a ni a ti a. Poilice hna chu intuaihriam reng ngai a nih thu sawiin FORENSIC SCIENCE LABORATORY te pawh  pawikhawih chhui kawng tangkai taka hman a ngai a ni a ti.  "Khawpui a thang zel a, tunah chuan Aizawi khawpui chu sawi loh kan khawpui dangah te pawh LIRTHEI (Traffic) buaipui tham kan nei tawh a ni. State pawn atanga lozin ten kan Traffic Police te an hawihhawm thu an sawi kan hre fo mai. A lawmawm hle a ni. Tun aiin tan la lehzual ila. Tunhnaiah Lirthei Accident a tam tawhzia kan lo hre thin. Hemi chungchangah pawh hian DAN bawhchhetute lakah chuan kan thikthu kan tihchhiat a ngai a, chutih rualin pawi sawilo Motor leh Driver te hi chu kan dimdawi tur an ni" a ti a.

PHYSICALFITNESS leh SELF DISCIPLINE chu mitin mamawh a nih rualin  police hnathawk tan chuan a pawimawh bik a - police chu an FIT tur a ni a ti a.   Chief Minister Pu Lal Thanhawla chuan ramchhung bakah tualchhung venhimna kawngah rang taka chechhuak thei tur, Rapid Force te pawh Mizoram chhungah pawh mamawh chhoh a ni tawhin a lang a ti a. "International ramri thui tak nei nei kan nih avangin Mizoram hi terrorist kuttuar ve thei dinhmunah a ding tih kan hriat a - hemi kawngah hian ramchhung venghimtute an muthilh leh lo inthlahdah a thianglo a ni", a ti a. POCSO leh hmeichhe kaihhnawih case fimkhur ngai bikte khawih tura police hmeichhia te an tlem tih sawrkarin a hriat thu leh hmeichhe tam zawk police ah an luh theihnan sawrkarin ngaihtuahna a sen mek thu a sawi a. Sum indaihlohna te in ziaawm lam a panchhoh mek zel avangin police hnaruak hnawhkhah hna pawh a tahtawla thawh a nihthuai a beiseiawm tih a tarlang a. Mizoram chhunga remna leh muanna  a awm chhunzawm zel nan police te thuamchak annih chhunzawm tur thu sawiin remna leh muanna a awm theihna atana senso chu sang mahse sawrkarin a ngaipawimawhber lo thei lo a ni a ti.

Thusawitu dang, Home Minister Pu R.Lalzirliana chuan dan leh thupek kenkawh chungchangah Mizoram police te an chhuanawm thu sawiin tunhnaiah buaina liantham sawitur a tam loh chhan chu police te inpekna rah a ni a ti a. Khawtlangah muanna a awm theih nan mipui te pawn police an thawhpui tha hle nia a hriatthu a sawi a. Hmun thenkhatah police in thiltisuala puh an man fel tawh hmelhmuh duh avanga police nawrbuai ching an awm thin chu a vanduaithlak thu a sawi a. Police te hnathawk tur lo tihbuai chu thil zahthlak leh danbawhchhiatna tho a ni a ti. Inthlang ram in a hmachhawn thin inthlan a hnaih leh taka avanga buaina tenau leh vantlang nunphung tibuai zawka hmalakna chi hrang hrang lo awm theite a lo tlem zawk nan police te chu tang sauh turin leh  khauh leh zuala Law & Order kengkawh turin a chah a. Tunhnaiah ramhruaitulu leh a chhungkua dinhmun hlauhthawnawma danbawhchhia ten an dintir chu a pawi a tih thu sawiin MRP leh Battalion lama sipai te zingah buaina rang taka tukdai tur engemaw zat, inralringrenga awmtur ruahman a ngai tawh a ni a ti. Home Minister chuan police te chu hlemhletna do kawngah leh mahni hriselna in uluk kawngah midangte tan entawntlak nih tum turin a chah a. Midang te aia hrisel zawk tura beisei an nih angin police ten nun uluk an mamawha, Self discipline leh physical fitness ah police te inenfiah kan ngai a ni a ti.

Pu Thianghlima Pachuau, DGP in Mizoram Police Officers' Conference with Chief Minister neih a nih dan leh Police  hmalakna thenkhat tarlanna hun hmangin conference hi tan a ni a. Pu C. Zorammawia, IGP pawhin thusawina hun hmangin Pu Joseph Lalchhuana, DIG (CID) chuan Mizoram Police hnathawh leh hlawhtlinna te Powerpoint hmangin a tarlang a ni.

Police Officers' Conference with Chief Minister ah hian President's Police Medal for Distinguished Service chu Chief Minister Pu Lal Thanhawla'n officer 2- Pu L.H. Shanlian, IGP, Director, ACB leh Pu Joseph Lalchhuana, DIG(CID) hnenah a hlan a. Police Medal for Meritorious Service pawh Officer 6- Pu Jimmy L.Renthlei, DSP, ACB, Pu VL Hmangaihzuala, DSP, Legal Br, PHQ, Pu Manik Lal Das, DSP, SO to DIG(NR), Pu B.Lalnghakliana, DSP, A/C 2nd IR Bn, Pu K.Laltluangliana, DSP, PS to Parl Secy, S&YS,etc.. leh Pu Lalrinawma, ASI(OPr) hnenah a hlan nghal a. Home Minister Pu R.Lalzirliana'n Cheng 20,000 leh chawimawina thuziak kengtel, Best Police Station Award 2016 chu Sialsuk Police Station(P.S) hnenahah a hlan a. Lawmman 2-na leh 3-na te chu Hnahthial P.S leh Aizawl P.S hnenah a hlan a. He hunah hian Mizoram Police News Letter chu  Lt.Col ZS Zuala (Retd.) Parliamentary Secretary an tlangzarh a ni.

Overview of Mizoram Police in a tarlan dan chuan Mizoram Police a hnathawktu awmthei zat chu 12,064 niin thawktu 9637 awm mekin hnaruak 2427 a awm a ni. Police headquarters hnuaiah Range 2, District 8, Sub Division 16, Police Station 40, outpost 16 a awm bakah Battalion outpost 68 a awm mekin 2017-2018 atan Rs.49,244.84 Lakhs budget an nei a ni.