Aizawl Development Authority (ADA) meeting vawi 15-na chu vawiin khan Chief Minister’s Office Conference Roomah Chief Minister Pu Lal Thanhawla kaihhruaina hnuaiah neih a ni.

Meeting-ah hian Indian Institute of Technology (IIT), Kharagpur in Aizawl Master Plan, Vision 2030 an buatsaih a Final na ni 15.11.2012 a sorkara an thehluh chungchang sawihona neih a ni a. He Master Plan Finalna hi ADA hnuaia Board of Enquiry & Hearing in draft plan anih laia an zirchian tawh hnua a hmawrbawkna, final Plan an rawn thehluh a ni a. Hetia Final Plan rawn thehluh anih takah chuan, meeting hian a bawhzui hna leh kalpuitu tur atan Zonal Development Plan siam a remti nghal a ni.

Aizawl Master Plan,Vision 2030 hi Powerpoint hmanga a tlangpui hrilhfiahna neih a ni bawk.

Meeting-ah hian Pu R.Lalrinawma, Law Commission Chairman, Lt Col.Z.S. Zuala, MLA, Pi L.Tochhawng, Chief Secretary, Aizawl Municipal Council CEO, ADA memberte leh official dang an tel bawk a ni.