Vawiin chawhnu dar 01:00 khan Serchhip District Fire Prevention Committee chuan an Chairman Pi Juhi Mukherjee, District Bawrhsap ni bawk hovin DC Meeting Room-ah kumina Fire Prevention Week hman dan tur an sawi ho.
He meeting hian Serchhip District tana Fire Prevention Week chu DC Conference Hall-ah hman ni sela, a hun tur erawh chu State Level Committee-in February 11 emaw 18ah emaw a rawn tihchian tur a la ni. He week hawnna inkhawm kaihruai tur hian President, Sub Hqrs. YMA chu beisei a ni a, Khuallian atan District Bawrhsap chu ruat nghal a ni bawk.
He meeting-ah hian ram kang tur ven dan leh a pumpelh dan tur kawng hrang hrang sawi ho a ni a, ram kang tam ber hi chu lo hal avanga thleng a nih avangin Environment & Forest Department leh Rural Development lam ten a theih chen chenah mipui leh loneitute hnenah zirtirna lo pe se, chet pawlawh leh fimkhur tawk loh vanga kangmei chhuak tur laka kan him theih nan zirna sikul lamah pawh zirtirna pek nise tiin an rel bawk.
Village Council te pawhin meilam sial a nih ngei theih nan te, sawrkarin hunbi a tuk chung ngeia lo neituten an lo vah an hal ngeina turin an bial chhung theuhah hma lo la se, tin YMA branch te pawh Fire Fighting Squad te indinin ram kang veng tura inralring reng tura beisei an ni a, mimal leh pawl ho ang pawh a huan leh lo hal tur nei zawng zawng ten zau tawk takin mei lam an sial ngei tur a ni. Mahni vah bak tikangtute lakah dan anga action lak tur a nih avangin tumah mei chhuah lo turin committee chuan a ngen a ni.
He committee hian Executive Engineer, Power & Electricity Department chu kangmei laka kan khawtlang kan lo him zawk theih nan an consumer zawng zawngte Internal Wiring that leh that loh chek veka, a tha lo leh him lote chu hunbi tuk neia siam that a nih ngei theih nana hma la turin a ngen bawk a ni.
