Chief Minister Pu Lal Thanhawla hovin vawiin khan Chief Minister’s Office Cabinet Meeting Room-ah Aizawl City Centre sak tur leh Kawrpuichhuah a Integrated Check Post (ICP)din tura hmalak dan te sawiin Revenue Minister Pu R. Romawia, FinanceMinister Pu Lalsawta, Commerce & Industries Minister Pu H. Rohluna, Pu Lalram Thanga, Principal Secretary to CM & PCCF; leh Revenue Dept. leh Commerce and Industries Dept. hotu thenkhat chu an thukhawm.

New Market-a Aizawl City Centre Annexe sakna tura ruahmanna awm hrang hrangte meeting-ah hian sawi niin, Foreign Lane leh Land Revenue & Settlement Department quarter engemawzah awmna ah sak tura rawt a ni a. Aizawl City Centre hi NEDP hnuaia sumdawnna hmunpui leh thianghlim tak ni tura ruahman a ni a. Sak a nih chhung hian a nghawng tur chin dawrkai te awm lailawkna atan a bulhnaia market building NEC sum hmanga sak mek chu hmang thei tura rawtna siam a ni bawk.

Bangladesh nen ramri insumdawntawnna atan hmun pawimawh tur Integrated Check Post (ICP), Kawrpuichhuah a din tur chungchangah Chief Minister chuan Bangladesh pawhin insumdawntawnna tura hmalakna chu an phurpui thu leh nasa taka hma an lak thu sawiin, hemi kawngah hian Mizoram lam pawhin theihtawp a chhuah ve a tul thu a sawi a. Bangladesh lama official-te leh Mizoram Commerce & Industries chuan ramri ah hian Joint Inspection lo nei tawhin, vawiin meeting-ah hian harsatna tawh thenkhat te leh hmalak dan tur te sawiho a ni.

Integrated Check Post hi Land Ports Authority of India in ram pahnih inkar insumdawn tawnna atan din ngei tura a tih niin, immigration, customs, border security leh tul dangte buaipuitu awmkhawmna tur a ni a; parking, warehousing, banking, hotel leh thil tul dangte pawh he hmunah hian awm tel vek tura ruahman a ni.