Aizawl Development Authority (ADA) chu vawiin khan Chief Minister Office’s Conference Hallah Chairman Pu Lal Thanhawla,Chief Minister hovin meeting pawimawh tak vawi 8-na neiin an thukhawm.

 

 

Meetingah hian thurel tur agenda 5 chhawpchhuah a ni a. Meeting hnuhnung ber, meeting vawi 7-na a thurel te bawhzui anih dante  thlirhona neih a ni a. Building Regulations kenkawh chungchangah chak tak leh khauh taka kalpui chhoh  zel nise tiin remtih a ni a. Hetihlai hian ngaihnathiam chin siam a ni bawk. Building Regulations hi ni 2 May 2008 atanga hmang tanin ni 15 Jan 2010 thlenga a dinhmun chu : In sak phalna dil zat -1557, Phal sak – 1276, Dilna hnawl zat – 19, Dilna sut zat – 44, Stay Order pek zat – 567, Stay Order kal mek – 396 te an ni a. Hengte bakah hian in thiah tur leh thubuai siam sak zat chu : In thiat tura buaipui mek – 64, In thiat tura order chhuah – 18, In thiah tawh zat – 1 leh thubuai siam sak zat - 6 te an awm thu tarlan a ni. Phalna nei lova in sa te emaw,  in thiah tur chungchang emaw ah hian ADA Building Regulation kalh lai te chauh kha action lak chin tur a ni a, a building zawng zawng chungah tuan tur a nilo. A tul anga pawisa chawi tir a regularize leh mai theih a ni. Chanmari leh Chaltlang inkar leh Bawngkawn leh Durtlang Leitan inkar kawng thlang lama a in sa ten kawng level pelin in an sa tur a nilo tih chu pawm a ni bawk. Building humhalh ngai bik leh hnam rohlu te nek bo theiha awmte humhalh nise tih a ni bawk a. ADA Budget for 2010 – 2011 atana cheng nuai 200 chu pawm a ni bawk a ni.

Meeting kaihruaitu ADA Chairman Pu Lal Thanhawla, Chief Minister chuan ADA hnathawk ten huaisen taka hna an thawhna ah fakawm a tihthu sawiin an chungah lawmthu a sawi a. Dik tak leh huaisen taka an hna thawk chhunzawm zel turin a fuih bawk a ni. ADA ah hian member 27 an awm a, vawiina meetingah hian an kal tha hle a ni.