No.7980/2020-2021

Aizawl the 31st March, 2021 : Vawiin khan Aviation Committee chuan an Chairman Chief Minister Pu Zoramthanga hovin Lengpui Airport tihchangtlun leh a kaihhnawih thu pawimawh hrang hrang ngaihtuahin CM office ah an thukhawm.

Aviation Committee hian Lengpui Airport License renew na tura Directorate General of Civil Aviation (DGCA) hnen atanga airport siamthat leh tihchangtlun chungchanga phut a neih hrang hrangte leh chung zinga tihhlawhtlin tawhte thlirho a ni a. Tuna hnathawh kal mek te leh thawh hmabak te sawiho a ni bawk.

Meeting-ah hian AAI tariff zulzuia service fee chi hrang hrang te lak ve tawh nise tia rel a ni a. Airport facility hrang hrang an hman atanga fee/tariff lak theih te chu sawiho a ni. Heng bakah hian Airport tihlen theih na tura tul hrang hrangte, hun lo kal zel tura International Airport a hlankai a nih theihna tura sawi ho tul te sawiho in, hma lak chhohna tura Conceptual Master Plan duan chungchangte sawiho a nih bakah Civil Aviation Wing a thawktu indaihlohna te meeting-ah hian sawiho a ni bawk.

Aviation Committee hian a hmun ngeiah heng hmalakna te hi a rang thei ang bera enfiah nise tiin a rel a. Vawiin meeting-ah hian Chief Secretary Pu Lalnunmawia Chuaungo, Addl. Chief Secretary Pu JC Ramthanga, Principal Consultant Aviation Wing Pu J. Lalhmingliana bakah Finance, Home, PWD, P&E, LR&S leh Planning department atangin member te an tel a ni.