NLUP hnuaia bawnglian vulh thlangtute tana AH&Vety department-in Punjab leh Haryana atanga bawnglian a lak luh zingah vanduai thlak takin kawng laka thi leh phurh thlen hnua thi leh hri vei eng emaw zat an awm a. Bawng vulhtu ten harsatna an tawh tak avangin a mawh phurtu AH&Vety department leh Mizoram sorkar flagship programme NLUP chuan nasa takin sawisel a tawk a. He vanduaina hi Mizoram sorkar-in a ngai pawimawh hle a. Chief Minister Pu Lal Thanhawla chuan Minister rual te, NIB hotute, official lama thuneitu sang te leh AH&Vety department hotu te chu May 31 tlai khan CM’s Office-ah kovin he vanduaina leh bawng lakluh chungchanga ruahmanna thar siam dan tur a sawipui.
Durtlang leh Sihphir vela Bawngvulhtu te harsatna en tur hian Vety Doctor te tirh chhuah nghal an niin ran damlo te chu a thlawna enkawl mek an ni a. Hmun hrang hrang a Bawng vulh tute chu Bawnglian enkawl dan a inchhawkin training neihpui mek an ni bawk.
Bawng lak luh chungchanga harsatna hi a thlen tan tirh atangin AH&Vety department leh NLUP Implementing Board(NIB) chuan chinfel tumin theih tawp an chhuah a. Bawng supply order chu sut nghal a nih bakah Supplier te hnena sum la pek bang pawh hrensak nghal a ni a. Kawng laka rawn phurh mekte erawh chu enthlak turin Vairengte ah leh Thingdawl ah te Quarantine shed siamin a lo thleng hmasa apiang khung hran nghal an ni a. Vety doctor ten an hriselna te an lo endik bakah uluk takin an lo enkawl a. Heng quarantine shed-a bawng te hi NIB hotu te chuan a hmunah kalin an enfiah a. Tuna bawng la awmte chu an dinhmun a tha in pek chhuah tlak vek an ni tawh a ni.
Bawnghnute a ram intodelhna tur thlirin AH&Vety department chuan NLUP hnuaiah bawng chi tha chaw lut a, tualbawng chi da lam tawh te nen thlah pawlh tir a, a chi tha tipung turin ruahmanna a siam a. India ram hmun hrang hrangah bawng chi tha, hnute tui tam chi lei tur a dap a. Harsatna tam tak karah Haryana leh Punjab atangin bawng lakluhna tur hi tihfel a ni a. Supplier te kutah innghat mai lovin Vety doctor ten ngun taka an enfiah hnua bawng tha tia certificate an pek te chauh rawn thawn chhoh a ni a. Kawng thui tak, 2500km vel zeta hla atangin kar 2 chhung khawlum hnuaiah bawng te hi truck a rawn phurh chhoh an ni a. Mizoram an rawn thlen meuh chuan bawngpui railai te hi an chau chhe hman hle thin a. Hei vang hian an chak lovin natna pawh an vei hma em em a ni. Punjab leh Haryana-ah te hian Vety doctor ruala tirh Farmers aiawh te pawhin bawng te hi tha an tih avangin an zinga pakhat chuan ni khata a hnute litre 20 lai sawr theih chu ama sum sengin a lei a. Sihphir a thlen hnuah litre 3 chauh a sawr theih a. A la hahdam loh vang leh chaw te a la ei that rih loh vang niin a lang.
AH&Vety department chuan Mizoram-a ranvulhtu ten ran hrisel leh tha an vulh theih nan leh, ranvulhtu ten harsatna an tawhte sukiang turin theihtawp a chhuah thin a. Bawnglian vulh thlangtu te tan pawh thil tha ber tur nia a hriat angin thahnem ngai takin hma a la a. Hetih laia beisei loh hetiang vanduaina lo thleng hi pawi an tiin bawngvulha eizawng mirethei te an lainat em em a. Chutih rual chuan bawngvulhtu te chu beidawng a thlaphang mai lo turin an duh a. An ran lo thi palh te pawhin an neih leh theihna turin sorkar thuneitu sang zawk hnenah an thlen tawh a. Tuna bawng lakluh te hi bawng chi tha leh bawnghnutea Zoram intodelh na tur an la ni ngei ang tih beiseiin vanduaina karah AH&Vety department chuan ruahmanna tha zawk nen, nasa zawka tan lak zel a tum a ni.
