1474/2024-2025

Dated Aizawl, the 7th August, 2024: Vawiin khan Mizoram Bharat Scouts & Guides State Council chu an President Pu Lalduhoma, Chief Minister hovin CM Conference Hall-ah an nei a, kumin kumtawp lama 8th North East Mini Jamboree neih dan tur an rel.

Chief Minister chuan, khawvel pumah Scouts & Guides member nuai zali sawmriat pathum vel an awm mek a. An awmna hmun theuhvah Pathian leh ram tan tiin hma an la a, midangte tanpuitu leh nun kawng dik kawhhmuhtu an ni. Keini pawhin kan thiante hmalakna ang bawkin kan ram leh kan khawtlangah hma kan la ve zel ang. Kan tih theih a tam lo anih pawhin kan tih chhun te chu tihhlawhtlin ngei pawh kan tum dawn nia, a ti a. Council member te chungah lawmthu a sawi a ni.

Council hian kumin November thla tawp lamah Tanhrila an hmunhmaa 8th NE Mini Jamboree (Scout & Guide khawmpui) thlen dan tur an rel a. Sum leh pai an mamawh dan te sawiin a hranpaa fund an neih loh avangin sawrkarah an dil a ni.

Chief Minister hian he inkhawmpui atana sum leh pai te hi sawrkar atanga pek an tum tur thu Council hi a hriattir a ni.

He meeting-ah hian Mizoram Bharat Scouts & Guides Vice President, Dr. Vanlalthlana, Minister, Pu Lalnghinglova Hmar, Minister leh Vice President dang te, Pu H. Lalhmingthanga, State Chief Commissioner leh Director, Sports & Youth Services Department te, Pu Lalngilneia Colney, State Secretary leh member dangte an tel tha hle a ni.