1473/2024-2025

Dated Aizawl, the 6th August, 2024: Vawiin khan Aizawl Young Men Christian Association te chuan World Peace Day, 2024 I&PR Auditorium ah an lawm a. Chief Minister Pu Lalduhoma chuan a telpui.

Thu a sawinaah Chief Minister chuan, khawvel history-ah indona chanchinin hmun a luah tam hle a, Bible kan chhiar pawhin indona thu a tam hle. Indona hi a lo irhchhuah chhan chu eng pawh ni se, a hmawr bawkna erawh chu dawhkanah inbiakna hmanga chin fel a ni deuh zel thin. Indopui pahnihna pawh kha Treaty of Paris inremna ziak a ni a, Indopui pakhatna pawh Treaty of Versaille hmanga chin fel a ni. Hei hian ralthuam hmanga inbeihnain remna min thlen zo lo tih leh innghirnghona hi inbiakna hmanga chin fel theih a nihzia a tilang. Buaina hmunah hmasawnna a kal thei lova, kum 20 chhung rambuai kan tawrh tawh atangin chu chu kan hmu a ni. Kan ram leh hnam hian hmasawn zel kan duh anih chuan remna leh muanna kan tungding tlat tur a ni, tiin kal khawmte a chah a. Chhungkuaa inremna ila, chhungkua atangin ram din ila, ram leh khawtlang nuam leh ralmuang kan din ngei ngei dawn a ni, a ti.

Aizawl YMCA President Dr. R. Lalthangliana, Regional Chairman, NE India Region ni bawk pawhin thusawiin, Chief Minister Pu Lalduhoma'n a telpui avangin lawnthu a sawi a. Chief Minister apiangte hi kan ex-officio Patron an ni, tiin lawmthu a sawi a ni.

Pu Shamir J. Thabah, Regional Secretary, NE India Region chuan chibai bukna thu a sawi a. Prof. Malsawmliana, General Secretary, Central YMA chuan thupui "Building a Just world - Justice, Peace, Equity & Human Rights for All" hmangin thu a sawi a, Er. K. Lalsawmvela, Honorary General Secretary, Aizawl YMCA chuan World Peace Day an hman chhan leh an hman dan tlangpui a sawi ve bawk. UN chuan International Peace Day atan September ni 21 a hmang a, YMCA hian Indopui pahnih laia Hiroshimaa Atom Bomb thlak ni hi World Peace Day atan an hmang ve thung.

Inkhawm hi Dr. Lalrinmawii Tochhawng in a kaihruai a, Pu Joe RZ Thanga, Jt. Secy, Aizawl YMCA chuan concluding remarks a sawi hnuah Dr. ZR Thiamsanga, Vice President, chuan lawmthu sawiin inkhawm a khar a ni.