Vawiin khan NLUP Implementing Board, Conference Hall-ah Chief Minister Pu Lal Thanhawla hovin International Competence Centre for Organic Agriculture (ICCOA), Bangalore aiawhten meeting an nei a. He meeting ah hian Pu H.Liansailova, Vice Chairman, State Planning Board; Pu J.H. Rothuama, Chairman NLUP Implementing Board; Agriculture, Horticulture, AH & Vety Department Secretary leh Director te, NLUP Implementing Board official te leh Mizorama organic farming kalpui mek pawl aiawhte an tel a ni.

ICCOA aiawh ten Organic Agricuture chungchanga an presentation an pek zawh hnuin Chief Minister Pu Lal Thanhawla chuan ICCOA ruahmanna leh tum dan te chu tha a tih thusawiin khawvel hian hlo tello thlai chin hi a ngaisang chho zelin, organic agriculture market pawh a lian chho zela a hriat thu a sawi a. ICCOA in Mizorama khaw thenkhat Bio Village kalpui tura thlan leh heng khua ah te thlai chi hnih khat thlan a, chu chu Organic Agriculture hmanga chin an rawt chu Department hrang hrang ten an sawiho tur thu hrilh a. Chumi hnua ruahmanna an siamte chu enpuia, a theih ang anga kawng te dappui turin ICCOA aiawhte hi sawm a ni.

He meeting ah hian Dr. A.K. Yadav, President, Board of Directors, ICCOA leh a thawhpui Pu Rohitashwa Gakhar, Head of Projects (North & North East), ICCOA te hian Organic Agriculture chungchanga khawvel leh India dihmun te tarlangin, Organic Agriculture tana thil pawimawh hrang hrangte tarlangin Presentation an nei a. Anni hian Mizoramin Organic agriculture abikin sawhthing, aieng, hmarchha, serthlum, hatkora, sapthei leh lakhuihthei ah potential a neih san thu an sawi.

Mizoram hi ram pumah organic agriculture-a policy nei state 12 te zingah a tel a ni.