Vawiin khan Sports & Youth Services Minister Pu Zodintluanga pisa ah Youth Club, thalai te tana hnathawk tha te hnenah lawmman semna hun buatsaih a ni a. Nehru Yuva Kendra Sangathan (NYKS) Mizoram in Mizoram pum huap leh District hrang hranga Youth Club hnathawk tha te a thlanchhuah hnenah lawmman hi Sports Minister Pu Zodintluanga chuan he hunah hian a hlan nghal a ni.
Pu Zodintluanga chuan NYK in Youth Club hnathawk tha te chawimawina programme a buatsaih chu lawmawm a tih thusawiin NYK hi thalaite hmasawnna atan din a ni a, hna an thawk tha hle a ni, a ti a. He hunah Lawmman la Youth Club aiawh tel te chu tha thlah lova thalai te hmakhua ngaihtuah a hna thawk zel tura chahin NYK thil tumte chu tihlawhtling ngei turin a chah bawk a ni.
State Level Best Youth Club Award hi Kualmawi Branch YMA, Bilkhawthlir in an dawng a, he lawmman hian pawisa fai cheng nuai khat a keng tel. District Level-a Best Youth Club Award dawngte chu Aizawl District-a Sihphir Venghlun Branch YMA; Lunglei District-a Bazar Veng Branch YMA Zobawk; Serchhip District-a Keitum Branch YMA; Lawngtlai District-a Lai Ram Youth Club; Saiha District-a Mara Thyutlia Py Branch Lorrianville, Serkawn; Kolasib District-a Kualmawi Branch YMA, Bilkhawthlir; Champhai District-a Zomi Cultural Club leh Mamit District-a West Phaileng Branch YMA te an ni a, District Award hian pawisa fai cheng 25,000 a keng tel a ni.
State Award dawngtu hi Sports & Youth Services Minister kaihhruaina hnuaia thlan niin District Award dawngtu te hi DC-te kaihhruaina hnuai thlan an ni.
