3242/2024-2025

Dated Aizawl, the 27th November, 2024: Vawiin khan Chief Minister Pu Lalduhoma kaihhruaiin Boeing Foundation hotute leh Mizoram sawrkar aiawhte CM Conference Hall-ah an thukhawm a. Boeing Company CSR Mizoram tana hman dan tur an sawiho.

Pi Praveena Yagnambhat, Chief of Staff & CSR Head, Boeing India & South Asia chuan an company dinhmun leh CSR an hman dan tlangpuite a sawi hmasa a. Boeing chuan India ramah Civil Aviation leh Defence sector-ah hma kan la a. Hnathawktu hi 6000 chuang kan nei a, CSR hmangin hmalakna tam tak kan kalpui thin. Covid lai khan Aizawl, Lunglei leh Siaha a Hospital-ah te pawh kan thawhpui Doctors for You te kaltlangin hmanrua kan rawn pe tawh nghe nghe. Mizoramah hriselna lamah leh zirna lamah hmalakna zau zawk rawn neih kan duh a, kan kal dan te rawn sawifiah pahin hma lakna tur kan rawn ngaihven a ni. Chief Minister leh a thawhpuiten inhawng taka min dawnsawnna leh min thawhpui an inhuamna hi ropui ka ti a. Kan lawm hle a ni, a ti.

Meeting hian Cancer zai ngaite zaitu tur doctor thiam bik, a thlawna Aizawla rawn tirh dan tur te, ZMC a ICU hmanraw tha leh tunlai ber ber dah belh dan tur te an sawi a. A tul anga Cancer Hospital leh ZMC hmunhmate tlawh hova bawhzui ni se, an ti.

Zirna lamah hian Boeing Company hian Learning Links Foundation nen hma an la a. Education department in Tinkering Labs an kalpui mek tihchangtlun thu te, Sukanya STEM labs, Mizoram zirna in thenkhata bun ve dan tur te leh hmalak theihna remchang dang te an sawi bawk.

Meeting hi Pu Vanlaldina Fanai, Commissioner & Secretary to CM in a kaihruai a, Pu Lalthansanga, EF & CC Minister, Dr. Vanlalthlana, Education Minister, Pu TBC Lalvenchhunga, Adviser to CM bakah official pawimawh engemawzat an tel a ni.