3243/2024-2025

2024 Sahmulphah thla ni 27: India ram puma naupang kum tling lo inneih tibo tura beihpui thlak tur, National Campaign “Bal Vivah Mukt Bharat” (Child Marriage Free India) chu vawiin khan Vigyan Bhawan, New Delhi-a hun buatsaihah Union Minister for Women and Child Development Pi Annpurna Devi chuan a hawng a. He hunah hian Mizoram aṭangin Child Marriage Prohibition Officer (CMPO) pali (Aizawl, Lunglei, Champhai leh Mamit) an tel a, tawnhriat inhrilh tawnna hunah Lunglei CMPO Pu C. Lalnunfela chuan kal khawmte hmaah Lunglei District-a kum tling lova nupui pasal inneih tibo tura an hma lakna chungchang a sawi.

He hunah hian Union Minister Pi Annpurna Devi chuan kum tling lova nupui pasal nei awm lohna India siam tura beihpui thlak tur a hawn rualin, kum tling lo inneih venna tur leh a ṭhat lohzia inzirtirna atan te, kum tling lova nupui pasal nei an awma report siam nan tea hman tur online platform, 'Child Marriage Free Bharat' portal chu a tlangzarh nghal bawk a ni.

He hunah hian Minister of State for Women and Child Development Pi Savitri Thakur bakah, sawrkar laipui leh state hrang hrang aṭangin mi pawimawh tak tak an kal khawm a. Kal khawmte chuan kum tling lova nupui pasal inneih tibo tura hma lak zel intiamna an chham rual bawk.

Campaign hawnnaah hian state hrang hrang aṭanga CMPO kal khawmte tan kum tling lova inneih tibo tura CMPO-te mawhphurhna leh tih tur hrang hrang inhrilhfiahna hun hman nghal a ni a. He hunah hian Lunglei District Child Marriage Prohibition Officer & District Programme Officer (Women & Child Development) Pu C. Lalnunfela chuan kal khawmte hmaah Lunglei District-a an hma lakna chungchang a sawi a ni.

Lunglei CMPO hma lakna hnuaiah hian Lunglei, Lungsen leh Bunghmun CDPO-te leh District Hub for Empowerment of Women (DHEW), Lunglei te chuan kohhran, zirna in, anganwadi centre, nursing school, home, hmeichhe hostel leh MHIP programme hrang hrangah te naupangte leh hmeichhiate venhimna chungchang leh kum tling lova nupui pasal neih ṭhat lohzia inzirtirna te an kalpui ṭhin a. Prohibition of Child Marriage Act, 2006 chungchang inzirtirna an buatsaih rah chhuahah Lunglei District-a khaw pakhata innei tur, a mipa zawk kum 21 la tling lo chu an inneih hun tura ruahman January, 2024-ah innei lovin, a kum tlin hun May, 2024-ah sawn phah a ni nghe nghe.