3244/2024-2025

2024 Sahmulphah thla ni 27: Vawiin khan NREGS Hall, Thenhlumah Lunglei District Agricultural Marketing Committee (DAMC) huaihawtin Bunghmun RD Block huam chhunga thlai thlan bik chingtu society hrang hrangte tan Mizoram Bana Kaih (Handholding) Scheme hnuaia thlai thar hralh dan tur kalphung inhrilhfiahna (sensitisation) buatsaih a ni.

He hunah hian Mizoram Agricultural Marketing Board (MAMB) Co-opted Member Pi C. Zochansangi chuan Bana Kaih ruahmanna hnuaia thlai thar chi li - sawhthing, aieng, hmarcha leh hmunphiah hralh kalpui dan tur leh thlai thar hralh chungchanga society-te mawhphurhna hrang hrangte a sawi fiah a. Line department hrang hrang - Horticulture Department; Land Resources, Soil & Water Conservation Department; Cooperation Department leh Agriculture Department aṭangin thu sawi ngaihthlak ni bawkin, zawhna leh chhanna leh sawi hona hun hman a ni bawk.

Lunglei District chhungah hian sawhthing, aieng leh hmarcha ching khua leh veng hrang hrangah DAMC hriatpui multipurpose society 79 awmin, hmunphiah ching society 54 an awm bawk a. Bunghmun RD Block hnuaiah hian sawhthing, aieng leh hmarcha ching society 15 leh hmunphiah ching society 15 an awm a ni.

Heti hian Lunglei District chhunga RD block pali - Lungsen, Tlabung, Lunglei leh Bunghmun block-ah te society-te tan Bana Kaih hnuaia thlai thar hralh kalpui dan tur inhrilhfiahna chu buatsaih kim a ni.