3245/2024-2025

Dated Aizawl, the 27th November, 2024: Vawiin tlai dar 4:00 khan Pu Lalnghinglova Hmar, Sports & Youth Services Minister leh Mizoram Bharat Scouts and Guides Vice President ni bawk chuan State Training Centre, Tanhrila buatsaih, Bharat Scouts and Guides 8th North East Mini Jamboree kharna hun chu khuallian niin a hmanpui a, Jamboree chhunga inelna hrang hranga tithate lawmman hlanna a nei nghal bawk a ni.

Khuallian Sports & Youth Services Minister Pu Lalnghinglova Hmar chuan Scouts and Guides member zirlaite fuihna thu sawiin, Scouts and Guides-a tel chu mahni mihringpuite rawngbawlna ropui tak a nih thu a sawi a. Amah ngei pawh lehkha zir lai atanga Scouts and Guides thil tihna lama inhmang fo thin a nih thu sawiin, Mizo tlawmngaihna nen pawh a inhmeh hle tih a sawi a. Zirlaite chu an hmazawna remchannna inhawng apiang tangkai taka hmang nghal zel tura chahin, khawvel inher danglam zel mila insiam rem ve zel turin a fuih a. A bikin zirlai Mizoram pawn atanga lokalte chu nakin zelah pawh Mizoram rawn tlawh fo turin a sawm bawk a ni.

Vawiina Mini Jamboree kharna hun hi Pu Lalngilneia Colney, State Secretary, Mizoram Bharat Scouts and Guides (BSG) chuan kaihruaiin kalkhawmte lawmna thu a sawi a. Mizoram Contingent-te chuan kalkhawmte lawmna hla mawi tak remin, Pi Lalnunsiami Pachuau, Jamboree Asst. Organizer & Jt. State Secretary, Mizoram State BSG chuan sawm bikte hnenah Jamboree pual thilpek a hlan a. Hemi zawh hian Pu Sarma, Jamboree Organizer & Assistant Director (Youth Programme) BSG chuan Jamboree report a pe a. Jamboree hmang tura ram chhung hmun hrang hrang; Assam, Meghalaya, Eastern Railway leh Mizoram atanga Scouts and Guides kalte chuan kalkhawmte hmaah hian mahni hnam lam theuhte entirin, Jamboree chhunga inelna huang hrang hranga titha lawmman semnain a zui a. Pu Thankhuma, State Commissioner (AR) Mizoram BSG chuan lawmthu sawiin hun hman hi a khar a ni.

North East Mini Jamboree hi India hmarchhak hmun hrang hrangah buatsaih thin niin, kumin hian a vawi riatna chu Mizoramin a thleng a. India ram hmarchhak hmun hrang hrang atanga Scouts and Guides-a inhmang zirlai kalkhawmte chuan UN-in Sustainable Development Goals a duante milin activities hrang hrang an neih bakah, Mini Jamboree hi India ram chhung hmun hrang hranga chengte inpumkhatna tur lam hawiin mahni hnam ziarang theuhte tarlang chunga kalpui a ni.