Vawiin chawhnu khan Chapchar Kut Organizing Committee chuan an Chairman Chief Minister Pu Lal Thanhawla hovin CM Conference Hall-ah kumin Chapchar Kut hman dan an thlirlet. Review meeting-ah hian Organising Committee Co-Chairman, Art & Culture Minister Pu R. Romawia bakah Committee member-te an tel kim hle a ni.

Meeting kaihruaitu Chief Minister Pu Lal Thanhawla chuan sawihawnna neiin, Chapchar Kut chu mipuiin an hlut zia te, huapzau leh pui zawka lawm duhtu an awm zel te chu lawmawm a tih thu a sawi a. Kum lo kal zel tura Kut hlimawm leh nuam tak, hnam ziarang phochhuak a hnam zahawmna tilang thei tur neih chhunzawm zel nan kumin Kut hman dan atangin member te chu an ngaihdan thawh turin a sawm a ni.

Chapchar Kut Organizing Committee Secretary, CYMA General Secretary Pu Lalhmachhuana chuan Report pe in, Chapchar Kut 2018 inbuatsaihna te, Kut chhimtute, Chapchar Kut 2018 a hlawhtlin theih nana Sawrkar leh pawl hmalaknate, leh thil chhinchhiah tlakte a tarlang a ni.

Kumin Chapchar Kut lawmna ni hnih awh a siam a ni chu member ten tha an tih thu an sawi a. Meeting-ah hian sawrkar leh pawl hmalakna leh thawhhona chu a chhenfakawm thu leh hnam incheina leh Mizo inthuam inbel chu a hlawhtling hle nia an hriat thu te sawi a ni bawk. Chung bakah chuan Commerce & Industries Department bultum a Food Court leh Handloom/ Handicraft Stalls hrang hrang zawrh te chu mipuiin an hlut in, stall neitute pawh an inhralh that thu tarlan a ni.

Vawiin Chapchar Kut Organizing Committee thukhawm hian Organizing Committee Member tihpun thu relin, chung zingah chuan YMA Office Bearer zawng zawng an tel dawn a. Chapchar Kut lawmna atana sum hman chu sawrkar sum a nih angin Audit chu pawm tlan a ni bawk. Chapchar Kut Souvenir, I&PR Department in a buatsaih chu hun remchang hmasa bera tlangzarh ni se tia rel a ni bawk.