Vawiin khan Chief Minister Pu Zoramthanga hovin CM Conference Hall-ah kumin Chapchar Kut hman dan tur rel in Chapchar Kut Organizing Committee chu an thukhawm a. Kumin Chapchar Kut hi March ni 6 ah tla in, March ni 5 ah kut urlawkna programme hmangin ni hnih chhung hman a ni dawn a ni.

Vawiin thutkhawmah hian Chapchar Kut lawmna ni hmasa zawk March ni 5 ah hian Art & Culture Minister chu Kut Pa niin Art & Culture Secretary chu Ku thlengtu ni turin leh, a lawmna pui ber March ni 6 ah chuan Chief Minister chu Kut Pa niin, Art & Culture Minister chu Kut Thlengtu ni se tia rel a ni a. Chapchar Kut lawmna hi Lammual ah nghah leh ni se tia rel niin, kumin Kut thupui atan “Zonun ze mawi chawi san” tih chu thlan a ni.

Kumdang angin kut lawm a nih chhung hian Painting leh Photo exhibition te, Flower Show leh Handloom leh handicraft phochhuah leh hralhna remchang siamin, Food Court pawh siam leh rel a ni a. Sawrkar department hrang hrang mawhphurhna changtu turte ruat an ni bawk. Vawiin meeting ah hian Chapchar Kut puala zingkara a huho a tlan (Chapchar Kut Run) buatsaih leh ni se tia rel a ni bawk. Sawrkar hnathawk leh mimal eizawnna hrang hrang neite leh midang a duh apiang ten March ni 2 atanga ni 6 chhung hian an hnathawhna hmunah mahni remchan dan anga Kut lawmna atan Zo thuam inbel theih ni se tia rel a ni bawk.

Chapchar Kut Organizing Committee chuan he Mizote kutpui ah hian Mizoram pawn a zofa awmte vhu tel ve tura sawm a rel a. Anni bakah hian ramdang atanga telpui turin heng – Bangladesh, Thailand, Myanmar, Korea, Japan, Nepal, Bhutan, China, USA, England leh Israel ram palai India rama awm mekte chu sawm a rawt bawk.

Vawiin meetingah hian Art & Culture Minister Pu R. Lalzirliana, Chief Secretary Lalnunmawia Chuaungo te telin, kut organizing committee member te an tel thahnem hle a ni.

Attachment

  • Loading attachment...