Vawiin khan Sports & Youth Services Department Minister leh Mizoram Bharat Scouts & Guides Vice President ni bawk Pu Robert Romawia Royte chuan State Training Centre, Tanhril-ah Dormitory Building a hawng.

Sports & Youth Services Department Minister Pu Robert Romawia Royte chuan thu sawiin Mizoram-ah fur a rei thin a vangin, Bharat Scouts & Guides campers ten harsatna tam tak an nei thin tih sawrkar chuan a hriatpui a, mi 100 chuang mut theihna Bharat Scouts & Guides te’n Dormitory Building an nei chu a lawmpui tak zet a ni, tih a sawi a. Minister chuan Sports piah lamah Youth Affairs hi hnam hmasawn nan leh than zel nan a pawimawh a, rei tak chhung chu Youth Affairs ah budget awm manglo in sawrkar a lo kal thin a, hun neih hmasak berah Youth Affairs tih chak nan sawrkar chuan budget-ah pawh pawisa a dah ang, tiin a sawi bawk a ni. Minister Pu Robert Romawia Royte chuan thalaite hmasawnna turin theihtawp sawrkarin a chhuah tur thu leh hmasawn zel a tum thu a sawi bawk a ni.

Minister Pu Robert Romawia Royte chuan State Training Centre a NCC cadet 200 train mek te chu kawmin, centre hi a fang kual nghal bawk a ni.

Dormitory Building leh a panna kalkawng siamna tur atan hian Kum 2017-2018 khan Mizoram Sawrkar atangin Rs 120 Lakhs hmuh a ni a, he hna thawk tur hian Pu Vanlalhuma Ralte, Dinthar, Aizalw chu thlan niin, Kum 2018, October Ni 3 khan hna thawh tan a ni a, January Ni 9, 2020 khan sak zawh fel a ni. Bharat Scouts & Guides State Training Centre panna kawng siamna atan hian Rs 7 Lakhs ruahman a ni a. Hemi hmang hian PCC Flooring Approach Road metre 92 a thui leh metre 3 a zaua siam a ni.

Dormitory Building atan hian Rs 113 Lakhs ruahhman niin, 20x11 metres a zau RCC Building chhawng hnih a sak a ni. Basement-ah hian Dormitory Room Pathum, Manager Room Pakhat, Toilet Pathum leh Bathroom Pathum te dah a ni.

He hun hi Sports & Youth Services Department Director Pu Zothanmawia chuan kaihhruaiIN, YWO Sports & Youth Services leh Mizoram Bharat Scouts & Guides Secretary Pi Saizampuii chuan lawmthu sawiin he hun hi a khar a ni.

Attachment

  • Loading attachment...