Mizote kutpui Chapchar Kut hman dan tur rel in Chapchar Kut Organizing Committee chu vawiin khan an chairman Chief Minister Pu Zoramthanga hovin CMO Conference Hall-ah an thukhawm.

Meeting hmasa lam a thurel tawhte thlirho in vawiin meeting-ah hian Programme Committee in Chapchar Kut lawmna ni hnih - February ni 28 leh March ni 1 chhunga hun hman dan tur chipchiar a duan chu ngaihtuahho a ni a. February ni 28 zingkarah "Chapchar Kut Tlan" neih ni se tia rel niin, Chanmari atangin leh Sikulpuikawn atangin zing dar 6 ah tlanchhuah a, Lammual a intawkkhawm in hun tawi hman tura rel a ni a. A ni hmasa zawkah hian Lammual programme chu chawhma dar 11 a tan tur niin, Kut Pa chu Art & Culture Minister Pu R. Lalzirliana niin Art & Culture Secretary Pu B. Lalhmingthanga chu Kut Thlengtu a ni dawn a. A ni hnihna, a lawmna pui berah hian Chapchar Kut Lammual programme chu chawhma dar 10:30 a tan tur a rel a ni a. Chief Minister Pu Zoramthanga chu Kut Pa niin Art & Culture Minister chu Kut Thlengtu a ni dawn a ni.

Kumin Chapchar Kut lawmnaah hian infiamna khawvela Mizoram tihmingthatute hnena Chawimawina Nopui hlan ni se tia rel niin, kuminah hian Footballer Jeje Lalpekhlua leh Everester David Zohmangaiha leh Lalrintluangi te hnenah chawimawina hlan ni se tiin organizing committee chuan a rel.

Vawiin Chapchar Kut organizing committee thukhawm chuan Chapchar Kut hi mipuiin hlim leh him taka an hman tlan theih nan venhimna lamah leh dan lekkawhna lamah fimkhur leh zual ni se tiin, police leh tlawmngai pawlten tan lak a tul thu an sawi a. Ruihtheihthil leh Dan in a phalloh thildang hmang leh kawl an awm chuan Dan angin an chungthu ngaihtuah a nih tur thu an sawi.

Kumin Chapchar Kut thupui atan "Zofate Inpumkhatna" thlan a ni.

Attachment

  • Loading attachment...