4768/2024-2025

Aizawl, the 24th March 2025: Vawiin khan CM Conference Hall-ah Chief Minister Pu Lalduhoma hovin Chapchar Kut Organising Committee ten kut thlirletna an nei.

Chairman Pu Lalduhoma chuan, Chapchar Kut hlawhtling tak an buatsaih avangin Organising Committee te chungah lawmthu a sawi a. A thlirletna hunah hian Kut kan hman leh hunah nuam leh hlawhtling zawka kan buatsaih theih dan tur thlir phaka ngaihtuahna kan sen thiam a tha a. Kut hi kan la hman zel hmel avangin hmasawn zel kan tum tur a ni, a ti. Nakkum lamah chuan District te hnena Kut hmanna tur sum kan pek thin pawh hi tihpun deuh dan dap thain ka hria, a ti bawk.

Kut thlengtu Pu C. Lalsawivunga, Minister, Art & Culture pawhin Chapchar Kut 2025 chu kut nuam, hlawhtling leh hriatrengtlak nia a hriat thu a sawi a. Aizawl leh district hrang hranga Kut hlawhtling taka buatsaihtu leh mawhphurtute zawng zawng chungah lawmthu a sawi. 

Member Secretary Prof. Malsawmliana chuan Kut hman dan report tlangpui a pe hmasa a. Chapchar Kut puala Photo & Painting Competition te, Flower Show te, Handloom Expo te leh Food Court te an hlawhtling hle a, an inhralh nasa hle a ni. Kut chhimtu mipui pawh an tha a, a lawmna pui bera Kut Pa, Chief Minister thusawi chu mipuite sawi zui hlawh tak thusawi ropui a ni, a ti.

Sum leh pai dinhmun lam hi Rs. 149.70 Lakh budget siam a ni a, Rs. 149.60 lakh vel sen ral a ni. Sum hmuhna lam hi sawrkarin Kut hmanna tur atan budget-ah Ra. 100 lakh a dahsa a, sponsor atangin Rs. 35.91 lakh vel hmuh a ni a, nikum balance tlema zawng a la awm bawk a. Chungte nen chuan leiba leh sum chuang bang nei lovin an inchingfel thei a ni.

Chapchar Kut Post Souvenir hi kum dang ang bawkin Information & Public Relations Department bultumin buatsaih zui leh nghal a ni a. April thla tawp lamah release theih beisei a ni.

Report an ngaihthlak zawh hian member ten an thlirletna an sawi hlawm a, nakkum Chapchar Kut hman dan tur tha zawk nia an ngaihte an sawiho bawk.