4769/2024-2025

Aizawl, 24.3.2025: Mizorama a hmasa ber atan Tree Growers' Mela, Aijal Club Park a buatsaih chu Horticulture Minister Prof. Lalnilawma chuan vawiin khan khuallian niin a hawng. He Mela hi ICFRE -Bamboo & Rattan Centre (BRC), Aizawl buatsaih a ni a. Ni hnih chhung (March 24-25) awh tur niin "The Future is Green: Invest in Trees" tih chu thupuia thlan a ni.

Tree Growers' Mela neih chhung hian mipui en tur leh lei theihin thing leh mau tiak te, pangpar leh adangte phochhuah a ni a. Exhibition ah hian Florists, Orchid leh Bonsai chingtute an tel a ni. Vawiin vek khan chawhnu lamah Technical Session neih niin, hetah hian mithiam te hnen atangin Composting chungchangte, Pa (mushroom) chungchang te, Agroforestry leh Forest Genetic Resources & Tree Domestication chungchang zirtirna pek a ni.
 

Horticulture Minister chuan thing leh mau pawimawhna hrang hrang sawiin, mihring khawsak phung a lo nawm phah na tur satliah mai nilovin, dam khawchhuahna atan thing phun leh humhalh chu a tul takzet thu a sawi a. Tunhnaia Mizoramah leh a bik takin Aizawla tuihna kang chat leh tui thianghlim indiahlohna kan neih te pawh hian thing leh mai humhalh lama kan theihna zawn theuh a hma kan lak a tulzia a lantir thu a sawi. Minister chuan thing phun uar ah ringawt duhtawk lova, a puitlin ngei theihna tura enkawl zui a tul thu te, mahni tan chauh nilovin kan tu leh fate tana chenna tlak khawvel kan siam theihna hmanrua a nih thu te a sawi a. Thing leh mau te hi boruak nuam leh thianghlim siamtu atan chauh nilo, mi tam tak tana eizawnna hnar pakhat a nih thu sawi telin, ram economy hmasawnna hnar tha tak a nih theih thu a sawi bawk.

He hunah hian Pi Ramdinliani, Horticulture Department leh Agriculture & Farmers' Welfare Department Secretary leh Pu Lalnunsanga Khawlhring, DFO Aizawl, EF&CC Department te chu khualzahawm an ni a. Secretary Pi Ramdinliani chuan watershed development scheme hrnag hrang kalpui tawhte hi a thil tum ber tuihna humhalh leh tihpun chu ngaihthah a, eizawnna scheme dang ang bawka kan hman thin avangin hma kan sawn theih loh phah nia a hriat tur a sawi. Aizawl DFO Pu Lalnunsanga Khawlhring chuan sik leh sa inthlak "climate change" hi thil thleng mek, ngaihtuahawm tak a ni tih kan hriat thar a tul thu leh, Mizoram chu ramngaw nei tam kan nih avanga ngaihtha ringawt thei kan nilo a ti a; a hunlaia hmalak nachang hre lo chu a tuar nasa ber tu an nih thin thu a sawi.

Virtual in ICFRE-RFRI, Jorhat Director Dr. Nitin Kulkarni chuan thu rawn sawi bawkin, India ram dang tehkhin chuan Mizoram leh India hmarchhak state dangte chu ramngaw tha tak an la neih avanga an vanneih thu a sawi a. Chutihrual chuan mau leh ramngaw humhalh leh phun belh pawimawhna inzirtirna hi thlah chi hauh a nih loh thu sawiin, thangtharte hnena he inzirtirna hi kan chhunzawm zel loh chuan an lo puitlin hunah humhalh chhunzawm nachang an lo hrelo palh ang a, kan ngaw tha tak te hi a la chereu palh thei a ni, tiin Tree Growers Mela chuan rah tha a chhuah ngei a beisei thu a sawi.

He Mela hawnna inkhawm hi Pu Sahdeep Yadav, Scientist-D & Head, ICFRE-BRC chuan kaihruaiin, Pu Subhaprada Behera, Scientist-B, ICFRE-BRC chuan lawmthu sawiin hun a khar a ni.