No.6058/2020-2021

Aizawl the 13th October, 2020: Chief Minister Pu Zoramthanga hovin vawiin chawhnu khan School Education, LESDE, etc. Minister Pu Lalchhandama Ralte, MYC Chairman Dr. Vanlaltanpuia leh sawrkar hotu dangten central service-ah Mizoram thalai tam zawk an tlin chhoh theih nana hmalak dan tur an sawiho a. He meeting, CM Office Conference hall-a neih ah hian Delhi-a coaching kal turin full sponsorship siam an rel.

Chief Minister chuan kan thalai te zingah central service a lut an tlem tulh tulh avangin tan lak a tul thu a sawi a. State thalai te India ram zau zawka rual el pha, rual khum pha an nih theih nan tun atanga tan lak kan ngai hlawm a ni, a ti. Chief Minister chuan tunah Delhi a zirna tur kawng inhawn sak tumna chu tha a tih thu sawiin, thalai te hma khua ngaihtuah chungin central ah te, state ah te, thuang hrang hranga sawrkar chuan hma a lak sak tur thu a sawi a. Ruahmanna an siam te chu tihlawhtlin a nih theih nan a thalaite sang tak thleng thei tura chherchhuak tur chuan sum pawh a remchang ang ang hman a nih tur thu a sawi.

Vawiin meeting-ah hian tuna prelims leh mains a inziak tlingte tana cash incentive award siam leh, coaching academy te nen tangkawp a crash course siam bakah hian thalai thahnemngai, tlin tum tak tak te puihna turin Delhi a coaching academy tha tak tak te nen thawkho a, a hmun a an zirna tur leh an zir chhunga an awmna tur te puihna tur full sponsorship siam an rel a. Sponsorship hmu tura exam buatsaih dan tur te, seat siam zat tur leh ruahmanna pawimawh dangte chu siam thuai ni se tih a ni.

Vawiin meeting-ah hian Finance Commissioner, Planning Commissioner, LESDE Special Secretary, GST Joint Commissioner, Economics & Statistics Director leh MYC member leh official te an tel a ni.