No.3565/2020-2020

Vawiin chawhma dar 10:30 khan Chief Minister Pu Zoramthanga hovin a pisaah COVID-19 hripui lengin Mizoram chhunga College admission chungchanga harsatna a thlen theih dan sawiho a ni a. He sawihonaah hian Higher & Technical Education Minister Dr. R. Lalthangliana, Higher & Technical Education department Commissioner, Finance Commissioner, Higher & Technical Education officialte, DP&AR official te leh IASE Principal-te an tel a ni.

COVID-19 hripui leng vangin ram pawn atang Mizoram mi leh sa a sing telin an rawn haw tawh a, engemzawzat rawn la haw tur an awm bawk a, heng zingah hian zirlai thahnem tak an awm a, engtikah nge he hripui leng hi a kian dawn tih hriat a ni lova, zirlai tam tak chu an zirlai chhunzawm tura kir leh thei dinhmunah an ding lo ni a hriat a nih avangin leh College admission tih tan a hun tawh bawk si avangin Mizoram chhunga College zawng zawngte chu kum dang aia zirlai tam zawk admit dan ngaihtuah turin sawrkar pawhin a ngen hial tawh a. Hetih rual hian zirlai tam zawk lak belh a nih chuan zirtirtu lam indaihlohna nasa tak avangin harsatna a awm thei dawnin a lang a, tun dinhmunah College hrang hrangah zirtirtu Assistant Professor hna ruak 200 chuang a awm mek bawk a ni. Chief Minister Pu Zoramthanga chuan zirlaite harsatna tawh theih ni a lang leh College lam harsatna awm thei hi ngai pawimawhin Higher & Technical Education Minister Dr. R. Lalthangliana, Higher & Technical Education department Commissioner, Finance Commissioner, Higher & Technical Education officialte, DP&AR official te kovin ruahmanna thar neihpui turin ngaihtuahna an sengho a ni.

Institute of Advanced Study in Education (IASE MIZORAM), Republic Veng, Aizawl ami hi kum kalta khan India rama IASE tha berah thlan a lo ni tawh a, amaherawhchu he institute a zirtirtute leh thawktu dangte hi Centrally-Sponsored Scheme (CSS) hnuaia hlawh la an nih avangin tunah hian harsatna nasa tak an tawk a, Chief Minister ho hian IASE Mizoram harsatna tawh pawh vawiin hian an sawiho nghal bawk a ni.