NLUP chak leh zuala kalpui anih theihna turin Chief Minister Pu Lal Thanhawla chuan hmalakna zauhin, NLUP Implementing Board pui tur leh thurawn petu tura committee tunhnaia a siam, Consultative Committee for NLUP chu vawiin chawhnu khan a office cabinet room-ah meeting a neih pui.

Consultative Committee for NLUP (CCN) Chairman hi Pu Rualzakhuma, IAS (Rtd) a ni a, Member Secretary ah Dr.L.T. Thanga niin member 11 an awm bawk a. Chungte chu Rev Lalzuithanga, Rev Dr. K. Thanzauva, Prof.Lianzela, Prof. Lalrintluanga,Dr. Lalnilawma, Dr.J.V. Nunchunga, Dr. Robert S Halliday, Pu R. Ramhmangaiha, Pu D.R. Zirliana, Pu Zion Lalremruata leh Pu V.Z. Kaia te an ni a.

CCN ina a thawh tur tlangpui chu NLUP Implementing Board (NIB) in ram hman dan tura project a siam leh kalpui chungchanga thurawn pek te, line department hrang hrang ten mumal taka an chanpualte a tih hlawhtlin theihna tura kawng kawhhmuh te, NLUP ina a kaihhnawih zawng zawngte inpawh tlang taka thawk tura hmalakpui te, tanpuina dawngtute hnena chak zawka hna an thawhna tura hmanrua sem chungchangah leh harsatna awm te sutkianna kawnga NIB thurawn pekte a ni.

NLUP Office a CCN hnathawhna hmun tur pawh tih fel vek tawh a ni a. An hnathawh hun chhung hi kum khat ni phawt tura duan a ni.

Meeting-ah hian CCN member zawng zawngte bakah Pu R.Selthuama, Chairman, NIB, Pu P.L.Thanga, Vice Chairman, NIB te an tel a ni.