Vawiin chawhnu dar 1:30 khan Environment & Forests Deptt. Conference Hall, Tuikhuahtlang-ah kum 2011 – 2012 leh 2012 – 2013 chhunga ramsate thil tihchhiat leh nunna hlu tak hial chântute hnenah zângnadawmna (compensation) pêk a ni.

He hun hi Pu JL Singh, IFS, Principal Chief Conservator of Forests & Principal Secretary, Env. & Forests Deptt.-in a kaihruai a, Pu Liandawla, IFS, Chief Wildlife Warden-in report tawi pein Pu Rosiama Vanchhong, IFS, Addl. Principal Chief Conservator of Forests keynote address a pekna ah ramsate thil tihchhiat zângnadawmna pek hi sorkarin a hreh hauh lova, amaherawhchu, tanpuina sum hmuh duh vanga dik hlel deuhva tih erawh a tha lova, a tuartu dik takte chu sorkarin a tanpui thin a. Hetianga buh leh thlai emaw, hliam leh thihna hial thleng a awm chuan department lamin uluk takin an enfiah thin ang a, a phute ngei zângnadawmna a pe thin tawh dawn a ni,” a ti.

Pu JL Singh hian Mitthi- 11, hliam tuar- 10, ran vulh lai ramsain a lak sak- 19, buh leh bal tihchhiatsak- 2439 te hnenah zângnadawmna hi a hlan a ni.

Ramsate avanga nunna hlu tak chântute hi Rs. 1,00,000/- (cheng nuai khat)-a ral an ni a, hliam tuartute hi an inenkawlna senso tum sak an niin, an ran vulh ramsain a lâksakte hi an ran vulh len dan azira pêk an nih bakah buh leh bal chântute hi an thil chän dan azira zângnadawmna pêk a ni bawk.

Vawiina zangnadawmna pek zawng zawng hi Rs. 42,16,593  a ni.