Vawiin khan Mizoram Agriculture Service (MAS)-a tling tharte puala kar khat awh Orientation Programme chu Agriculture Committee Room-ah zawh fel a ni.

Programme kharna hun hi Dr. C. Lalzarliana, Director of Agriculture (Crop Husbandry) chuan hmanpuiin MAS-a tling tharte chu ei leh bara intodelh kawngah theihtawp chhuah turin a fuih a, Agriculture Department hi Mizoram hmasawnna tur atana thawktu pawimawh ber te zinga mi a nih thu sawiin taima tak leh rinawm taka ram leh mipui tana thawk tur leh an thiamna leh finna te a tam thei ang ber hmang fo turin a chah.

Agriculture Director chuan Officer tharte chu mi rinawm te zinga tel tura a duh thu sawiin an rilru leh ngaihtuahna te zalen taka Department tana hmang fo tur leh hnathawh tirh atanga rilru inpe tak chung leh mahni invawng uluk reng turin a chah bawk. Mi dangte nena thawhho thiam tur leh a tul hun apianga mahni lam inenfiah fo thin a tul thu te, hotute zai ngaithiam fo tur leh Sawrkar hna hi hlawh hmuhna atan chauha hmang lo va, Pathian leh ram tana kan rawngbawl ve theihna a ni tih hre reng chunga hna thawk turin a chah a, Agriculture Department hi kan ei bel a nih angin kan humhim tur a ni a ti.

Kar khat awh Orientation Programme-ah hian Department-a Branch hrang hrang hnathawh dan leh Department kalphung te inhrilh hriat a ni a, Dihmunzawl, Neihbawi Farm leh Khamrang-ah te Field Visit neihpui an ni bawk.

He Programme kharna inkhawm Pu Lalrinliana, Joint Director of Agriculture kaihruaiah hian Pu Rohmingthanga Colney, Deputy Director (Extension), Orientation Programme-a Course Coordinator ni bawk chuan report tawi a pe a, Officer tharte hnen atangin Feed Back ngaihthlak a ni bawk. MAS tling tharte hi Mizoram Agriculture Service Association (MASA) Office Bearer-ten an pualin thingpui inpuina an nei bawk.