Vawiin chawhma dar 11 khan CS Conference Hall-ah Chief Secretary Pi L. Tochhong hovin University of Minnesota (USA) leh Mizoram University (MZU) ten Memorandum of Understanding (MoU) an siam chhinte en hona neih a ni.

Pi Tochhong chuan Minnesota University mithiamten Mizoramah research rawn neih an duhna leh Mizoram University (MZU) te nen thawhhona neih dan tur ruahmanna chu pawimawh a tih thu sawiin, NLUP a hmalakna nen pawh a tam thei ang ber a tangkai pui anih tur thu a sawi.

Pu P.L. Thanga, Vice Chairman, NLUP Implementing Board (NIB) pawhin hmalak anih dan leh NLUP chanchin an hriat avanga Mizoram pawh rawn tlawh hial tu Minnesota University hi hman tangkai anih theih dan tarlangin ramngaw leh nungcha humhalh, tuihna humhalh leh dahkhawlna tha ngaihtuah, kut hnathawktuten hlawk leh tha zawka eizawnna an neih theihna tur, NLUP a kan kalpui mek chi ah te hian an tangkai thei dawn a nih thu a sawi.

Meeting hian University pahnih ten hmalakna an lo neih tawhte leh MoU sign mai theih tur an lo buatsaih MZU hotuten an tarlang chu an thlirho a ni.

USA atanga University mithiam ten hmalak an rawn tumna ah hian sum tam tak a ngai thei a, chumi atan chuan MZU chu Central University anih angin central lam atangin he project atana mamawh te, eng ang in nge hmalak anih tawh te an sawi ho.

Chief Secretary chuan University lam hotute hnenah MoU an siamah lawmawm a tih laiin uluk tak leh MZU leh Mizoram sorkar-in a tul ang a buaipui tur chinte fimkhur takin lo zirchiang leh turin a chah a ni.

Meeting-ah hian NIB lam hotute leh MZU lam hotute an tel a ni.