No.795/2020-2021

Chief Minister Pu Zoramthanga chuan vawiin khan Agriculture Minister Pu C. Lalrinsanga leh Agriculture department officer-te nen CM cabinet meeting room-ah inkawmin, COVID-19 hrileng avanga kuthnatawktute harsatna tawh sukiang tura department hmalakna thlirletin, hmalak zel dan turte an sawiho.

Chief Minister chuan buh leh bala intodelh chu tuna Mizoram mamawh leh sorkarin a ngaihpawimawh ber a nih thu a sawi a. Ei tura intodelh leh mipui hriselna chu hmasawnna atana pawimawh hmasa ber, SEDP hmalakna pawhin a thiltum pawimawh a nih thu sawiin, ram hmasawnna hna dang nen pawh a kalkawp zel tur thu a sawi a. Chutihrual chuan tuna covid hrileng ang hun khirhkhan tak dang pawh lo tawng leh mah ila, mipui ten harsatna lian lutuk tawk lova kan hmachhawn theih nan kan intodelh a tul a ni, a ti. Hemi atan hian Agriculture leh a kaihhnawih department hrang hrangte chu an pawimawh thu Chief Minister chuan a sawi a. Lockdown chhunga department in kuthnatawktute tana hma an lo lakna chu lawmawm tiin, Covid-19 hrileng avanga harsatna tawh mek atang hian hmalam hun thlir zel chungin kan damkhawchhuahna tur leh, dinhmun tha zawka kan inhlanchhoh theihna turin thahnemngai taka thawhho pawimawh a tih thu a sawi.

Vawiin meeting-ah hian kuthnathawktute tana thlai chi phai lama chah reng ngai lova kan intodelh theih nan a Research and Extension in buh chi thenkhat te, kawlbahra leh thlai danga an hmalakna chungchang te sawi tel niin, loneitute tana fur ruahtui khawl leh tui kawng tha taka siam te a pawimawh thu te leh mechanization atana hmalaknate an sawi a. COVID-19 avanga project kalpui mek engemawzat a thuanawp thu tarlan a ni bawk.

Union Finance Minister-in a puan tawh angin COVID-l9 avanga loneituten harsatna an tawh palh theih tur laka inven nan PM-KISAN hnuaia Loneitu 80,888 te account-ah April ni 22, 2020 thleng khan Rs. 16,17,76,000 thun sak an ni tawh a. Lockdown kalpui anih chhung hian Mizoram loneituten harsatna an tawh lohna tura hmalakna hrang hrang zingah phone hmanga an harsatna an thlen theihna tura Directorate of Agriculture-a Farmers’ Helpline siam te; TV kaltlanga Lockdown-in Loneitute harsatna a thlen chungchang sutkianna tur leh kumina harsatna awm theite laka lo inrin lawkna tur zirtirna Live Discussion buatsaih te; Task Group on Agricultural Inputs hmalakna te sawi a ni a. Lockdown puan lai hi Mizoram loneitute tan thlai chi thlak hun tha ber a nih avangin Loneituten thlai chi an mamawh te dawr atanga an lei theihna turin State Level Task Force hotute nena ruahmanna a siam thu leh, loneitu thlai chi mamawhte tan a theih ang angin DAO ten thlai chi ngaihtuahsakin a thlawnin an sem thu leh, Leilet Buh Chi a mamawhte tan ngaihtuahsak mek an nih thu an sawi.

State Flagship Program SEDP hnuaiah kumin hian Agriculture Department chuan Acre 2500 laia zauvah Vaimim Quintal 174 chin tum a ni a, hemi atana vaimin chi mamawh te, thlai venhimna hmanrua Sprayer te chah thlen a ni tawh a. Heng vaimim chi te leh Sprayer te hi Loneituten a hun taka an dawn theih nan DAO te hnenah sem chhuah a ni a. SEDP hnuaia Vaimim chi chah thlen bakah hian Loneituten an mamawh belh Quintal 201.47 chah belh niin sem chhuah nghal a ni.

Lockdown avangin Mizorama Oil Palm rah leia sawngbawltu awm chhun Godrej Agrovet Ltd. hnuaia thawktu thenkhat an ram lama an haw avanga Oil Palm Mill Chawlhtir a nih avangin Mizorama Oil palm chingtuten harsatna nasa tak an tawh mek avangin Godrej Agrovet hotute nen inbiain, a rang thei ang bera Oil Palm Mill tinung turin ngen leh hriattir an ni a. April Ni 20 atang khan Oil Palm Mill an tinung leh ta a, Lockdown atanga tun thleng hian FFB metric tone 454.5 Oil palm chingtuten an hralh leh tawh a, hei hi Rs. 25,00,000 man a ni. FOCUS District 4, Champhai, Serchhip, Kolasib leh Mamit hnuaia khaw hrang hrang tan Value Chain Crops Sawhthing, Aieng leh Mizo hmarcha chi te sem a ni tawh bawk.

Sub Mission on Agricultural Mechanisation (SMAM) hnuaiah Custom Hiring Center 50, Power Tiller 75, Mini Power Tiller 75 leh Paddy Transplanter te subsidy-a pek tura ruahman a ni a, Power Tiller hi sem chhuah tan a ni tawh a. District tinah Chul rih uar tura infuih a ni a. COVID-19 leh Lockdown avangin Kolasib leh Mamit District-a Leileta hnam dang chhawrte anmahni khaw lamah an haw avang leh an ran lakluh te lakluh a remchan dawn tawh loh avangin leilet siamah harsatna a awm thei dawna hriat a ni a, Survey neih niin heng leilet atangte hian Buh Thar a tlakhniam phah lohna turin Mechanization Scheme (Custom Hiring Center) emaw FOCUS atangin emaw lei lehsak tura ruahmanna siam mek a ni.

Loneitute sum lakluh a lo pun theihna turin tuna Vaimim an chin hi an seng zawhah Vaimim bawk emaw, Bekang emaw, Chana (Field Pea) emaw ching leh tura hma lakpui an ni a. SEDP hnuaiah Be lam chi (Pulse), Arhar (Jhum-ah), Rajma, Field Pea te 1,400 Acre a zauvah chintir tum a ni.