No.796/2020-2021

Vawiin khan Mizoram Legislative Assembly-a Legislature Party hrang hrang aiawh MLA te chuan Mizoram Legislative Assembly Speaker Pu Lalrinliana Sailo hovin a pisaah COVID19 chungchang meeting pawimawh tak an nei.

Meeting-ah hian Pu Lalrinliana Sailo chuan Lok Sabha Speaker Om Birla hovin State hrang hrangin Video Conference an neih chungchang a report a. State hrang hranga Legislator (MLA)-ten COVID-19 chungchang an inhrilhhriat zung zung theih nan leh hmalak dan tur inhriat pawh tlanna turin Parliament-ah leh State Assembly hrang hrangah control room siam nise tiin Video Conference-ah hian thu tihtluk a ni a. Speaker chuan Mizoram Legislative Assembly pawhin he thutlukna hi zawmin COVID-19 pual hian control room siam ve nghal a nih thu a sawi bawk.

Legislature Party hrang hrangte aiawh thukhawm chuan COVID-19 hri leng mek leh sawrkar hmalaknate an thlirho a. Sawrkar hmalakna hrang hrang bakah kohhran, tlawmngai pawl, Village/Local Task Force te hmalakna leh mipui thlawpna chu lawmawm an ti a. MLA te hian lungrual taka sawihona hun hmangin a tul ang zela sawrkar hmalakna puibawm tur leh mipui te harsatna sukiang tura hmalak zel an inhuam thu an sawi a. Mipuite chu fimkhur tak si a, thlamuang taka awm turin an chah a ni.

Vawiin meeting-ah hian Deputy Speaker Er.Lalrinawma, Opposition Group Leader Pu Lalduhoma leh Pu Zodintluanga bakah MLA dang panga Pu Vanlalhlana, Dr. BD Chakma, Pu Lalchhuanthanga, Pu L.Thangmawia leh Pu Lalrindika Ralte te an tel a ni.