No.797/2020-2021

Vawiin khan Champhai district chhunga inkharkhipna dan, May Ni 4 atanga 17, 2020 thleng awh tur chungchang leh kalpui dan tur chu DC Conference Hall-ah Bawrhsap Pu Mark Lalthanliana hova rel a ni. Meeting-ah hian Official-te, NGO hrang hrang aiawh, Champhai District VC Association hotute, Chanchinbumite leh Champhai Dawrkai Association hruaitute an tel a ni.

Bawrhsap leh Champhai District Task Force on Covid-19 Chairman nibawk Pu Mark Lalthanliana chuan district kalzel dan tur ngaihtuah tura thahnemngai taka kalkhawmte chungah lawmthu sawiin, inrawnkhawmna zau zawk leh infinchhuahna neih chuan hnathawh a ti awlsam a, mimal maia thutlukna siam lova inrawnkhawmna leh sawihona eng atangin a tha ber a chhuak thei thin ani, a ti a. May Ni 4 atanga tanin thu leh awm hma chuan zan dar 7 atanga zing dar 4 inkar Curfew puan anih thu leh hemi hun chhungin danin phalna a pekte bak tumah pawnchhuah awih anih dawn loh thu sawiin, mipuite chu thupek zawm hram hram turin angen a. Covid-19 hri leng dona leh a darhzel tur veng turin State sawrkarin dan thar ‘The Mizoram (Containment and Prevention of Covid-19) Ordinance, 2020 a siam thu pawh sawiin, dan thar hnuaia inkaihhruaina siamte zawmlote chungah hremna lekkawh tur anih thu a sawi a. Champhai district chhunga Covid-19 dona kawnga tha thlah lova beitute zawng zawngte chu chhuanawm tiin, VLTF ten an huamchhung theuha thahnemngai taka hma an la thin chu fakawm a ti a. Inkharkhip hun chhung rei ang reng tak hman ani chuan sum leh pai, ei leh bar zawn kawngah harsatna a thlen a, hripui kian huna kal dan tur thlenga ngaihtuahna sen tel zel a tul thu sawiin, eizawnna ngelnghet leh thil thar entrepreneurship lamte pawh kan uar deuh deuh angai dawn a ni, a ti a. State pawn lam atanga nitin mamawh chakkhai leh bungraw lalut turte tan mCOVID-19 Apps hmanga dilna siam mai a remchan thu leh Essential Commodities tan a hranpa a phalna la lovin declaration thehluh mai a tawk thu leh Non-Essencial Commodities tan erawh Home Department atanga phalna lak hmasak angaih thu a sawi a. Covid-19 dona kawnga thawhhona tha tak a awm zel a tul thu sawiin, tawrhna leh harsatna awm chang pawha hotute hnena thlen zel thin tura chahin, khawtlang hruaitu leh Champhai district mipuite chu lungrual leh thahnemngai taka thawhho pui zelah a sawm nghal a ni.

Pu Rex Zarzoliana Vanchhawng, SP Champhai chuan thawhhona tha tak hnuaia inrawnkhawmna leh kalzel dan tur rel ani thin chu lawmawm a tih thu a sawi a. Ramri depa awm kan nih avangin kan inthlahdah thiang lova, harsatna awm pawha phunnawi mai lova thahnemngai taka thawk zel tur kan ni, a ti a. Inkharkhip dan puan leh chuan District administration, Police, VLTF leh tlawmngai pawlte inkarah thawhhona tha zawk a awm a tul tih a lantir mai bakah, mipuite chungah mawhphurhna thui tak a innghat tih a entir a ni, a ti a. Lockdown puan hma atangin Champhai Police te’n khualzin phur Lirtheite passenger neih dan kimchang an thlithlai reng tawh thu sawiin, Champhai luhna Khankawn Police Gate-a State pawn atanga Lirthei lokala chuangte Champhai an luh leh chhuah dawn thenga an endik leh thlap thin thu a sawi bawk.

Pu Lalnunfela Chawngthu, SDO (Sadar) in State guidelines zulzuia duan chhin district tana inkaihhruaina dan chu ngaihtuahho atan a chhawpchhuak a, uluk taka ngaihtuahho anih hnuin a hnuaia tarlan ang hian Champhai district chhunga lockdown kalpui dan tur chungchanga hriattirna tih chhuah a ni.

A. Hnathawh chungchang:

1. Hmasawn nana hmalakna hnathawh (Department works) leh mimal eizawnna hnathawhna (Brick leh Chow siamna, Bakery, Furniture works, Workshop etc) chu phalna hranpa lak ngai lovin kalpui theih a ni. Amaherawhchu ram chhunga awmsa labour-te chauh ruaia thawh tur a ni. Hnathawktu ten ‘SOP on Social Distancing’ zawm chungin hna an thawk tur a ni.

2. In sakna leh hnathawhna hlawhfa rawih ngai chi VLTF te hriatpuinain thawh chhunzawm theih a ni ang a, hnathawhna hmunah hian mi 5 ai tam lo ni thei se. Tul bik thila mi 5 aia tam thawh a tul pawhin VLTF hriatpuinain inhlat takah hmai tuam chungin an thawk tur a ni.

B. Bazar/Dawr hawn dan tur chungchang:

1. Bazarpui chu khar chhunzawm tur a ni a, Chawhmeh bazar hi mahni VC area theuhah a hranpain siam theih a ni ang a, amaherawhchu inkarhlat takah seat siam tur a ni a, a dawr tute pawh inkarhlat tak (feet 6 aia hnai lo) ah awm zel tur a ni. Thlai zawrhna hmun hi hmun zawl zau lai - School kawt zawl, inkhelhna field tual emaw ni thei se.

2. Chawhmeh, thlai leh thei te in lama pek (home delivery) phal a ni.

3. Zing dar 8 atanga tlai dar 5 thlengin (Thawhlehni, Nilaithawhtan leh Inrinni) heng dawrte hi hawn theih a ni ang – Eichawp dawr, Insakna bungrua (Hardware leh Electronic items lam) zawrhna.

4. Zing dar 8 atanga tlai dar 5 thleng (Thawhtan, Nilai leh Zirtawp) ah a chung a tarlan bak zawng dawr dang hawn theih a ni ang.

5. Mihring, ran damdawi dawr leh Agriculture kaihhnawih zawrhna dawr erawh chu kartluanin hawn theih a ni ang.

6. Dawr hawn theihin a huam zingah heng te hi a tel lo – Restaurant leh Thingpui dawr, Spa, Beauty Parlour leh Khawlai a inpho dawr (Street Vending) te. Khawlaia inpho tih hian VLTF ten khawlaia chawhmeh bazar an siam a huam lo ang.

7. Mahni ina dawrte siamte chu VLTF ten an in hawn dan tur ruahmanna an siamsak ang.

8. Dawr neitu ten an mahni dawr tute feet 6 aia hnai lovah an awm vek tur a ni a, rinbial an siam vek tur a ni.

9. Thingtlang atanga khawpui rawn dawr duhte chuan an dawr tur veng VLTF te hnenah an kal hun tur leh an mamawhte an thlen hmasa tur a ni. Hei hian kartluanin eng ni pawh (Pathianni tiam lohin) a huam ang.

10. Dawr nghaktu hi mi pathum ai tam awm phal a ni lova, dawr nghaktu zawng zawng ten hmai an tuam ngei ngei tur a ni.

11. Dawra thil lei turte chu chhungkaw khat atangin mi pakhat bak chhuah phal a ni lo.

12. Ei siamna Restaurant/Hotel in Home delivery in an thil siamte chu an awmna veng VLTF recommend hnu ah DC phalnain sem chhuah theih a ni ang a, a semtute hian DC atangin movement permit an nei tur a ni.

13. Public park, Picnic spot, Movie theatre, Gym, Community hall, Mall leh intawllenna hmun zawng zawng chu khar chhunzawm tur a ni.

C. Zin veivah leh mipui chet vel chungchang:

1. State pawn atanga bungrua lakluh theih zingah nitin mamawh (essential commodities) te chu phalna hranpa lak ngai lovin lak luh theih a ni ang. Amaherawhchu, mCOVID-19 mobile application-a mPASS hmangin declaration an thehlut ngei ngei tur a ni.

2. Nitin mamawh ni lo (non-essential commodities) bungraw dang la lut turte erawh chuan mCOVID-19 mobile application a mPASS hmangin Home Department phalna an la hmasa tur a ni.

3. Mizoram chhung bika bungraw phurh leh thiarte tan phalna hranpa lak a ngai lovang.

4. Tul bik thil heng - chhiat tawh, damloh leh eizawnna thil pawimawh bik a nih loh chuan zin veivah loh tur.

5. Khaw kar kawnga passenger phur lirthei (commercial passenger vehicle) te tlan phalsak an ni ang. Heng lirtheite hi registration number ‘odd-even’ angin an intlanchhawk ang. Number kawpkimlo Odd number (1, 3, 5, 7, 9) a tawp lirtheite chu Thawhtanni, Nilaini leh Zirtawpni-ah an tlan ang a. Number kawpkim Even number (2, 4, 6, 8, 0) a tawp lirtheite chu Thawhlehni, Ningani leh Inrinni-ah an tlan thung ang. Pathianni-ah chuan tlan phal a ni lovang. Passenger thut theih zat (seating capacity) atanga 50% chauh an phur thei ang. Heng passenger phur motor a chuang te hian mask/hmaituamna an vuah ngei ngei tur a ni a, passenger te hman tur hand sanitizer an pai reng tur a ni. Khankawn Check Gate-ah an passenger list nen an in report ngei ngei bawk tur a ni

6. Khawchhunga service Bus, Taxi leh Auto rickshaw te chu a chunga tarlan ang khian ‘odd-even’ angin nitin an in tlanchhawk ang. Passenger thut theih zat atanga 50% chauh an phur thei ang.

7. Tul bik thila private motor tlante pawh ‘odd-even’ angin, a chunga tarlan ang khian an tlan ang. An passenger phurh turte pawh seat capacity atanga a chanve (50%) an phur thei ang.

8. Intlanchhawk hian sawrkar hnathawkte Motor, VLTF duty motor, Ambulance leh emergency a hman te, print leh electronic media mi motor, bawlhhlawh paih motor, bawnghnute sem motor te a huam lo ang. Sawrkar hnathawk motor duty a hmante hian office ID emaw Detailment Order an keng tel thin tur a ni.

9. Champhai pawn lam atanga bungraw rawn lut reng reng chu Champhai khawchhung a rawn thlen veleh a hma thei ang berin unload nghal tur a ni. Khankawn atangin bungraw phurtu ten a chah tute an rawn hriattir tur a ni a, bungraw chah tuten VLTF te hriattirin a hma thei ang ber in unload tur a ni.

10. State pawn lam atanga Bungraw rawn thiar luttu Driver leh Handyman te chu an bungraw unload zawh ve leh haw tir leh nghal tur a ni a, an bungraw unload chhung hian mi dang hnaih ah an awm tur a ni lo a, khawiah mah an chhuak vak tur a ni lo. State pawn atanga bungraw rawn thiar lut driver leh handyman te bul hnaia lo khawsa (mutria leh midang) kan awm a nih chuan quarantine tur an ni ang.

D. Inkhunghran (Quarantine) chungchang:

1. Mizoram chhunga zin veivak te hi COVID-19 symptoms nei emaw COVID-19 vei nena ‘contact history’ nei an nih loh chuan quarantine an ngai lovang.

2. District Medical Board chu Home Quarantine tur chungchang a thuneitu an ni.

3. Champhai atanga State pawn lam a bungraw phur an awm anih chuan Driver leh Handyman te chu an rawn haw hunah Quarantine Centre ah an khawsa anga, bungraw lak hna an thawh chhung chu midang tlawh pawh lohin an awm tur a ni. Load an lak hnuhnun ber atanga ni 14 chhung khung hran an nih hnu ah mahni in lamah haw phalsak an ni ang.

E. Sawrkar Office chungchang:

Sawkar Office hawn leh kal dan tur chungchang chu State Guidelines in a tarlan ang a kalpui tur a ni.

F. Lo a feh chungchang:

1. Feh turte chuan silai leh nungchate suat theih na tur hmanrua engmah an keng tur a ni lo.

2. Tiau kam leh Myanmar border lam a feh tur bik te tan a hnuai a mi ang hian kalpui tur a ni a. Feh turte chu VLTF te’n permit an siamsak tur a ni a, permit ah chuan an hming, address leh an fehna hmun tur (lo an neihna hmun) leh an feh ni (date) ziah lan tur a ni.

b. Mahni area pawn lam a feh turte chu an va fehna tur hmun a VLTF te hnenah an permit nen an in report tur a ni a, permit neite chu harsatna siamsak loh tur a ni.

c. Feh hun hi kal hun leh haw hun mumal takin VLTF ten siamsak tur a ni. Feh/loa kal te hi an haw hunah VLTF te hnenah an in report tur a ni.

d. Nitin a feh tur chi leh riak tur chi te chu permit ah thliar hran tur a ni.

G. Pawimawh dang te:

1. Tupawh khawlaia chhuakte reng reng VLTF duty-te tiamin hmai an tuam ngei ngei tur a ni a, feet 6 aia inhnaihin tumah awm loh tur a ni.

2. Lockdown chhung hian mi 5 (panga) aia tam punkhawm khap tlat a ni.

3. Tul bik thil - damdawi lei, buhfai/ration lak, chawhhmeh leh ei bar lei tura chhuah lawk – tih loh ah chuan tumahin mahni in leh compound an chhuahsan tur a ni lo.

4. Tuman khawlaiah chil chhak loh tur, a tilui chu dan ang a hrem tur an ni.

5. Puipunna lam thil reng reng la huai hawt loh tur a ni. Inneih lawmna (reception), lungphun, anniversary leh birthday lawmna, games & sports, book release, politics leh pawl thila kalkhawmna, intihhlimna chi reng reng te he hun chhung hian huaihawt phal a ni lo.

6. Inneih inkhawm, mitthi vuina leh khawhar inah mi 20 ai tam pun khawm phal a ni lo.

7. Loh theih loh thil a nih loh chuan, kum 65 chin chunglam te, taksa hriselna lama harsatna nei sa te, nau pai te leh naupang kum 10 hnuailam te mahni inchhungah inkharkhip vek tur a ni.

8. Ram pawn atanga lo lut mikhual te tumahin thlen (mikhual) phal a ni lo. Hei hian Home Department emaw Deputy Commissioner te phalna neite a huam lo vang.

9. Mahni vengchhung mi hmun danga awm mekte list neih theuh tur a ni a, a bik takin Foreign leh State pawn a awm te ngaih pawimawh tur a ni. Tin, mahni vengchhung mi nilo, hmun dang atanga lokalte an awm a nih chuan VLTF te hnenah in report tir ngei ngei tur a ni. List hi veng tin Village Level Task Force tehma la tura ruat an ni.

10. VLTF duty-naah Post tin ah mi 5 aia tam duty loh tur a ni a. Upa Pawl member-te chu duty tir loh nise.

11. Zan dar 7:00 leh zing dar 4:00 inkarah mihring leh motor chhuah khap tlat a ni. Thupek zawm lo te chu IPC Section 188 hmangin hrem tur an ni ang. Hei hian Covid-19 duty leh DC in a bik a phalna a pek te a huam lo vang.