No.798/2020-2021

Vawiin hian Serchhip District Level Task Force on Covid-19 te chu an chairman Dr. Lalzirmawia Chhangte, IAS hovin DC Meeting Hall ah an thukhawm a, Lockdown pawhsei chhunga hnathawh dan tur sawrkar thuchhuak hrang hrang leh a kenkawh dan turte an sawi ho.

Dr. Lalzirmawia Chhangte, IAS chuan, Covid-19 beihna kal zelah hmalakna dan tharte a lo chhuak zel a, dan hmanhmawh (Ordinance) te awmin, heng dan te hi a kengkawhtuten tha taka kan kalpui theih nan kan hriatchian a tul tih a sawi a. Serchhip District chhunga hmalak tawhnaah mawhphurtuten tha taka hna an thawh thin avanga lawmthu sawiin, Police leh VLTF te an thawk tha tlang hle chu a lawm hle tih a sawi a ni. Tun hnaia state thenawma tangkhang lo haw te zingah Serchhip district mi 28 an lo haw tawh thu leh heng mite hi dan ang thlapa lo dawnsawna, khunghran mek an nih thu a tarlang.

Pu R. Sathiyasundaram, IPS, Superintendent of Police pawhin thu sawiin, Ordinance kenkawhna kawng tinrengah leh dan dang kenkawh kawngah engtiklai pawhin Police te chu biakpawh theih reng an nih thu a sawi a. Mipui punkhawmna thil pawimawh heng Gas lak, ni za inhlawh ang chiah te, Social Distancing kenkawh a tulna hmun apiangah Police te pun thin turin khawtlang hruaitute a sawm a ni.

Vawiina meeting ah hian Lockdown pawhsei kalpui dan tura sawrkar dan ruahman te sawiho anih bakah Village Level Task Force te hnathawh zel dan tur chungchangte sawi a ni a. Village Task Force te hi naktuk lamah kohkhawma an hmalak dan tur sawihona hun neihpui ran tha tih tlan a ni.

Meeting-ah hian member te an kal tha hle a ni.