2907/2022-2023

Aizawl, 1.12.2022: Vawiin December ni 1, 2022 atang hian November ni 30, 2023 thleng India ramin G-20 Presidency nihna a luah dawn a. Hemi hun chhung hian ram chhung hmun hrang hrangah inbuatsaihna meeting 200 chuang nei tura beisei a ni a. Chung zinga mi Business -20 meeting chu nakum 2023 March thla hian Aizawlin a thleng dawn a. He meeting atana inbuatsaihna tur hrang hrang vawiin khan Chief Minister Pu Zoramthanga hovin CM Office Conference Hall-ah a kaihhnawih sawrkar department hrang hrang hotute nen sawihona neih a ni.

Mizoramin G-20 meeting a thlen ve tur atana G-20 secretariat leh Mizoram Home Department indawrna te, a thlengtu state atanga beisei an neih leh hma lo lak tawhna hrang hrangte vawiin meeting-ah hian report a ni a. Hmalak ngai engemawzat te chhawp chhuakin, bawhzui dan tur te sawiho a ni a. Sub-committee hrang hrang siam a ni bawk.

Mizorama meeting neih tur hi Engagement Group Meeting niin, "Start Up 20" hming vuah a ni a. Nodal ministry chu Ministry of Commerce hnuaia Department for Promotion of Industry & Internal Trade (DPIIT) a ni a. He meeting hian start-up te thlurbingin, bamboo, handloom leh handicraft bakah nursing leh paramedics lam ngaihpawimawh zual bik a ni. Mizorama G-20 meeting atan hian Core Team siam niin, Home Department Commissioner chu Chairman a ni.

Vawiin meeting-ah hian Commerce & Industries Minister Dr. R. Lalthangliana, Tourism Minister Pu Robert Romawia Royte te, Chief Secretary, DGP leh department hrang hrang secretary leh director te an tel a ni.