2906/2022-2023

Pawlkut thla ni 1, 2022: Vawiin khan Mizoram Cleanliness Competition 2022 Sub-Committee, Lawngtlai chu an Chairman, Additional Deputy Commissioner Pi Marilyn Rualzakhumthangi hovin Mizoram Khawpui Fai Intihsiakna 2022 atana hma lakna leh hmachhawp thlir hovin Lawngtlai DC Conference Hall-ah an ṭhu khawm.

MCC 2022 Sub-Committee-ah hian Lai Autonomous District Council (LADC) leh State sawrkar hnuaia official-te, Lawngtlai khawpui chhunga village council ai awhte leh faina kawnga veng tina palai atana ruat local ambassador-te, tlawmngai pawl leh kohhran ṭhalai hruaitute, NSS ai awh leh chanchinbu mite an tel a. Chairman Pi Marilyn Rualzakhumthangi chuan member kal khawmte chu faina kawnga an hma laknaah lawm thu hrilhin, theih tawp chhuah chhunzawm zel turin a chah a ni.

He ṭhut khawmah hian Nodal Officer, UD&PA District Project Officer Pi TT Beikhaizi chuan MCC Sub-Committee kal tlanga hma lak tawhna report a pe a. Hma lak chhunzawmna tur hrang hrang zingah veng chhung tihfai hnatlang runpui buatsaih leh tur leh mipui zirtirna tlangaupui tam tura VC-te hnena ngenna thlen te, faina hnatlang thawk tur leh puanzarsak tura kohhrana ngenna thlen te, local ambassador-te'n children sanitation club kal tlanga hma an lak chhunzawm dan tur te rel a ni a. Krismas vuakvetah kohhrante'n ruai an siamnaah hman khat daih sarang (single use plastic) hmang lo tur leh bawlhhlawh ṭawih thei leh ṭawih thei lo thliar hrang turin ngen ni se, tih a ni bawk.