2905/2022-2023

Khawzawl, the 1st December, 2022: Khawzawl District AIDS Prevention and Control Committee buatsaihin vawiin chawhnu dar 1 khan Zaingen YMA Hall-ah World AIDS Day 2022 puala hun hman a ni. He hun hi Addl. DC Pu Lalvenhima chuan khuallian niin a hmanpui.

Khuallian Pu Lalvenhima chuan MSACS-in March 2022-a Mizoram dinhmun a tarlanah HIV+ hmuhchhuah tawh zawng zawng zat chu 23,755 anih thu leh heng zinga a tam ber 217,27 chu thalai kum 15-49 inkar an nih thu a sawi a. HIV inkaichhawnna tam ber chu mipat hmeichhiatna a ni a, Mipat hmeichhiatna atanga kai hi zaa 65 zet an tling a ni, a ti a. Tun ang zela mipat hmeichhiatna lama nun thlahdah deuha kan kal chuan he hri tha lo hian pul hri angin min man zel dawn a, kan ram hi dinhmun hlauhthawnawm takah kan ding dawn a ni a ti bawk.

Addl. DC chuan sawi chhunzawmin tun ang zela HIV+ an pung chak anih chuan ram leh hnam a nghawng dan tur hi ngaihtuah tham fe a tling a, thalai hnathawk thei (workforce) pung zel turte, ram hruaitu turte, thiamna bik neia eizawnna kawngahte, kohhran leh khawtlanga rawngbawlna lamahte leh thil dang chi hrang hrangah nghawng a nei thuai ang tih a rinawm a ni, a ti a. Thalaite leh naupang zawkte chu theihtawp chhuaha AIDS hripui chu thianghlimna, thuawihna, insumtheihna leh taimakna hmanga hneh tlat tum turin a sawm a ni.

He hun hi Pu K.Lalnunsanga, President, Sub-Hqrs. YMA, Khawzawl chuan kaihruaiin kalkhawmte lawmna thu a sawi a. Rev K. Vanlalzika'n hunserh a hmang a. HIV/AIDS chungchang zirtirna Dr. Albert Lalhminghlua, Medical Officer, District Hospital Khawzawlin a nei a. Captain John Zonunmawia hnen atangin thusawi ngaihthlak a ni a. Pu Lalchhuanthanga, SP, Khawzawlin lawmthu sawiin hun a khar a ni.

World AIDS Day 2022 pual hian nimin lamah thupui thlan bik hmanga lem inziahsiak zirlaite tan buatsaih a ni a. Vawiin khan lawmmante sem chhuah a ni a. World AIDS Day 2022 puala thupui thlan bik hmanga inzirtirna lam hawia lem inziahsiak result kimchang chu hetiang hi a ni:

A) Middle School Category:
1. Lalthlamuanpuia, PES Khawzawl, Class 7
2. B.Lalhmangaihzela, St. Joseph School, Class 8
3. Lalthuthlungmawia, Govt. Little Flower School, Class 6

A) High School Category:
1. Reuben Lalchhanhima, St. Joseph School, Class 10
2. Lalnghahmawia, St. Joseph School, Class 10
3. Esther Lalhmangaihzuali, PES Khawzawl, Class 9

C) Higher Secondary Category:
1. Leo Lalnunsanga, Khawzawl Higher Secondary School, Class 12
2. K. Lalramdini, Khawzawl Higher Secondary School, Class 12
3. Lalvenzeli, Khawzawl Higher Secondary School, Class 12