Vawiin khan Chief Minister Pu Lal Thanhawla kaihhruaina hnuaiah Sub Committee leh State level Committee on Green Mizoram ten CM’s Conference Hall, CMO Office-ah joint meeting an nei a, kumin ‘Green Mizoram Day 2018’ hman dan chungchang an rel.

Meeting thuhmahruaiah Chairman Chief Minister Pu Lal Thanhawla chuan kum 1998 atanga Green Mizoram hman a nih tan atangin nikum thleng khan Mizoram pumah thing nuai 37 chuang phun a ni tawh chu a lawmawm hle a, heng thingphunte enkawl zui leh humhalh zel hi mipuite tih tur pawimawh tak a ni, a ti.

Mizoram chu ramhmul damdawi chi hrang hrangah a hausakna hriain tunah hian sorkar laipui bultumin Research Centre pawh din tum a ni a; ramhmul damdawi chungchang zirna leh siamchhuahna khawvelah Mizoram chu a la lar dawn chauh a ni, a ti bawk. Mizoram sorkar pawhin nungcha leh environment humhalh chu ngaih pawimawh berte zingah neiin a hmalakna pawimawh ber NLUP-ah pawh Mizoram thing leh mau humhalh leh ramngaw tihzau zelna tur kawng a ruahman zel a ni, a ti. Mizoram sorkar chuan silai licence a pek thin pawh titawpin ,tuna China lam atanga airgun lo lutte pawh khuahkhirh dan tur ngaihtuah mek a ni, a ti bawk. Tun dinhmunah Mizoram chu ‘green cover’ ringawtah chuan a sang ber pawl (87%) a ni mek a, chutih a nih rualin ramngaw tak tak erawh za 2% chauh a awm tawh a ni tiin Chief Minister chuan kumtin lo hal leh ram kangin Mizoram ramngaw engemawzat a tichereu mek zel chu a pawi takzet a; ram, thing leh mau humhalh leh kangmei laka ven hi mi zawng zawng mawhphurhna a ni, a ti.

PCCF & Principal Secretary Pu Lalram Thanga, IFS chuan meeting agenda hrang hrangte sawihawngin member-te hriat tur thil pawimawhte a sawi a. Sorkar laipui chuan environment humhalh chu ngai pawimawh hle a, National Action Plan-ah ‘Green India Mission’ ruahman a nih thu te, Mizoramah erawh chuan kum 1998 atang daih tawhin kumtin ‘Green Mizoram Day’ hman a lo nih tawh thu te, Green Mizoram Day hman a nih atanga thingphun tawh zawng zawng zaa 66% chu nung thaa hriat a nih thu leh khawvel pumah 5th June chu ‘World Environment Day’ anga hman thin a nih angin Mizoramah pawh kuminah hman leh tur a nih thu leh hemi Ni atan kumina thupui thlan chu ‘Beat Plastic Pollution’ a ni tih a tarlang.

Vawiin meeting-a rel tak Green Mizoram Day 2018 programme chu a hnuaia mi ang hian hman theih beisei a ni :

A hun : 11th June 2018 (Thawhtanni), dar 7:00 AM

A hmun : Chite Lui kam, Ramthar-Thuampui leihlawn bul

Chairman : Pu Arvind Ray, IAS, Chief Secretary, Govt of Mizoram

Khuallian : Pu Lal Thanhawla, Chief Minister & Chairman, State Level Committee on Green Mizoram

Report : Pu Lalram Thanga, IFS, PCCF & Member Secretary, State Level Committee on Green Mizoram

Green Mizoram Day hmannaah hian kangmei laka ram veng thate ‘Awards for Fire Prevention’ chu Khuallian Chief Minister-in a sem nghal ang.