1535/2024-2025

Dated Aizawl, the 12th August, 2024: Vawiin khan CM Conference Hall ah Chief Minister Pu Lalduhoma hovin Mizoram State Policy Coordination Committee leh Implementing Department hotuten Hand Holding Policy kalpui dan tur (guidelines) an thlir ho.

He hunah hian Chief Minister chuan, Hand Holding Scheme hi tlangzarh kan chak tawh a, tihtur tul la awm apiang te chin fel vat vat kan duh tawh hle. Kan sawi fo tawh thin angin he scheme hi bank te nena tangkawpa kalpui tur, central scheme awmsa thenkhatte nena convergence a kalpui tur a ni a. Progress Partner te tana rulh leh ngai hmalakna deuh zel a ni. Amaherawh chu dahkham ngai lo, a tithate tana interest awm lo a ni thung. Tunhma chuan PMEGP te hi margin money duh vang maiin miten an dil thin a, hmalak tumna tak tak a awm thin lo. Hand Holding Scheme hnuaiah hi chuan khatiang chi kha a awm kan remti tawh lova, a thlawna sem kan tum lova, a dawngtu tur (progress partner) te hi duhsak bik nei lovin a hlawhtling ngei tur te chauh thlan tur a ni. Partner thlan leh enkawl zui hi Implementing department te mawhphurhna pawimawh a ni. Loan deuh veka kalpui tur a ni chungin eizawnna tha taka lo kalpui mek tawh sa, tlemazawnga han puiha hmasawn dawrh thei te puihna tur bik CM Special Package siam a ni dawn a, tanpuina sum erawh a tam thei lovang. He Special Package dawngtu tur hi Implementing Department te bawkin an thlang ang a, an vil zui bawk ang, a ti a. Kumin bik hi pilot project angin kan kal phawt ang a, a tul ang zelin kan tilian chho dawn a ni, tiin Hand Holding Policy bultan dan tur pawh a tarlang bawk.

Pu Lalmalsawma Pachuau, Member Secretary, MSPCC leh Planning Secretary ni bawk chuan Hand Holding kalpui dan tur (guidelines) duan tawh te sawifiahna a nei a. Pu LP Lalchangkima, MD, ZIDCO chuan Interest Free Loan kalpui dan tur leh guarantor-a sawrkar a tan dan tur ruahmanna te a sawifiah ve bawk.

Hemi hnu hian kalkhawmten hriatchian duh an neih ang ang te zawhfiahna hun an nei leh a ni.

Meeting ah hian Pu Lalthansanga, Land Resources, Soil & Water Conservation Minister, Pu PC Vanlalruata, Agriculture Minister, Pi Lalrinpuii, Tourism Minister, Prof. Lalnilawma, Horticulture Minister, Pu Lalnghinglova Hmar, Sports Minister, Dr. KC Malsawmzauva, Adviser to CM bakah Coordination Committee member te leh line department official pawimawh te an tel a ni.