1536/2024-2025

Saitual the 12th August, 2024: Vawiin chawhma dar 10:20 am khan GSC Auditorium, Govt. Saitual College, Saitual-ah "Nasha Mukt Bharat Abhiyaan" campaign hnuaia ruihhlo laka fihlim tura intiamna chu Saituala Govt. High School, Govt. Higher Secondary School leh Govt. Saitual College zirlaiten an nei.

He hunah hian Saitual Bawrhsap Dr. Lalngura Tlau chuan thu a sawi a, kan rama damdawiin chhungkua a tihbuai nasatzia te tarlangin, chhungkuaa fihlim vek an nih pawhin ruihhlo ti mite avangin khawtlangah an him chuang lo tih a sawi. Ruihhlo hian chhungkua leh khawtlang a nghawng nasat em avangin kum 10 tlin atangin ruihhlo laka fihlim tura kan intiam a pawimawh tih a sawi a, kan intiamnate kan tihpuitlin theih chuan a hlawkna teltu tur chu keimahni tho kan ni tih a sawi bawk. Bawrsap chuan drugs chu a hman dan tur dik taka hman a nih chuan nunna chhanhimtu a ni thei a, hman sual erawh chuan nun tichhetu a ni thei tih sawiin, chuvang chuan a la ti ngai lo te'n ti lo tura intiam a, a ti mekte pawhin sim tura hma lak a ngai tih a sawi. Tunlai khawvelah lehkhathiamte, infiammite leh zaithiamte tan ruihtheihthil tih hi a changkang tawh lo a, ruihhlo hi a ngawl vei tawh chuan bansan a harsa hle a, chuvang chuan Bawrhsap chuan zirlai naupangte chu an thutiamtea ding nghet tlat turin a chah a ni.

Nasha Mukt Bharat Abhiyaan campaign pual hian ruihhlo that lohzia pho chhuak thei lemziak intihsiakna buatsaih a ni a, zirlai naupang lemziak thehlut zingah Abel Thangbiakvel chu pa khatna niin, Lalrinpuii chu pa hnihna a ni a, Ruthi Vansangpuii chu pa thumna niin, midang zawngin consolation prize an dawng a ni.

He intiamna hun hi Pu Lalthakima Chhangte, Sub-Divisional Officer (S) in a kaihruai a, Saitual Bawrsap Dr. Lalngura Tlau bakah hian Resource Person Pu R. Lalruatkima President, Sub-Hqrs, YMA Saitualin thu a sawi bawk a ni. Pi Christina Lalnunfeli, Sub-Deputy Commissioner-in lawmthu sawinain he hun hi a khar a ni.

Nasha Mukt Bharat Abhiyaan (NMBA) hi Ministry of Social Justice and Empowerment hnuaia awm niin, mi tam zawkte ruihhlo laka an fihlim theih nana inhrilhriatna (mass awareness campaign) a ni a. Kumin Independence day vawi 78-na hi an launch atanga kum 5-na niin, kumin thupui atan "Viksit Bahrat ka Mantra, Bharat ho Nashe se Swatantra" thlan a ni. Hemi hnuaiah hian India rama school, university leh college hrang hrangah te ruihhlo ti lo tura intiamna neih thin niin Saitualah pawh Deputy Commissoner office-in he hun hi a huaihawt a ni.