No.1251/2020-2020

Aizawl the 20th May, 2020:Vawiin khan Chief Minister Pu Zoramthanga hovin CM cabinet meeting room-ah Horticulture Department hotute chuan department hmalaknate an thlir ho. Horticulture Development Board Vice Chairman Dr F. Lalnunmawia, Bamboo Development Board Vice Chairman Dr. K. Pachhunga te an tel bawk.

Chief Minister chuan COVID-19 avangin khawvel ram hrang hrang economy in tuar phah a, Mizoram pawhin kan tuar ve a; hemi atanga intungding tha leh tur hian kan state chuan primary sector a innghat in awlsam zawka inhlangkai turin theihna kan nei a ni, a ti a. Sawrkar laipui a innghat lo economy intodelh siam tura chuan kan ram leilung hman tangkai a tul thu sawiin, leilung ngheng (land based) a eizawnna tihhmasawn a pawimawh thu a sawi a. Chaw leh a hmeh a intodelh bakah economy hlangkai tura hausakna siam tura bamboo development a pawimawh thu Chief Minister hian a sawi bawk.

He meeting-ah hian 2019-2020 chhunga SEDP hnuaia Bamboo Development hmalakte thlirho in, National Bamboo Mission hnuaia Action Plan siam te sawiho a ni a. Thlai thar rang chi kuthnathawktuten an neih theih dan chungchangte, Mission for Integrated Development of Horticulture hnuaia hmalaknate leh department mamawh hrang hrangte sawiho a ni.

Horticulture Secretary Pu JC Ramthanga, Addl CS, Horticulture Director Dr. Elizabeth Saipari leh department officer dangte he hunah hian an tel a ni.