No.1252/2020-2020

Vawiin khan Education Minister Pu Lalchhandama Ralte, Tuivawl bialtu MLA chuan a bial chhunga ramri duty-na hmun - New Vervek Tuivai kai leh Khawpuar leh Vaitin inkar Zilthawhchhuah te a tlawh a, ei leh in tur bakah duty-te nitin mamawh hrang hrang leh damdawi, silpauline leh tangkafai a hlan.

New Vervek leh linghmunah hian Village Level Task Force hruaitute nena inkawmhona hun tawi te hman a ni a, Minister chuan COVID-19 dona kawnga Mizoram sorkar hmalakna hi duhthusam ni thei lo mah se, ram himna atan sorkarin theihtawp a chhuah a ni, a ti a. Mipuiin sorkar harsatna an hriatthiampui turin leh Hripui dona kawngah Kohhran, NGO te leh sorkar an mangrual zelturin a ngen a ni. Minister chuan hripui leng hian ram leh khawtlang nunah inhmangaihna leh induhsak tawnna rawn thlen zel se a duh thu a sawi a. Kum dang ngaihtuaha India ramin buh leh bal thar chhuah a nei tlem a nih pawha state a mam lohna turin mitinte lo inhmakhua lawk a, chhungkaw tinte intodelh turin tun amangin theihtawpa man la turin fuihna thu a sawi bawk.

Manipur leh Mizoram inrina, Tuivai kam New Vervek kaiah hian thla khat chuang zet chu tlawmngaite zan riakin an duty tawh a, hmun hnihah duty-na hmun siamin hmun khatah an riak a; an duty-na bul, lui kamah Manipur amanga lo lutte quarantine-na hmun tur an buatsaih bawk.

Tun dinhmunah New Vervek bakah Lungsum leh Damdiai amangin mi tlawmngaiten an rawn duty-pui bawk a ni. Manipur nena inrina duty-na hmun dang Vaitin khua leh Khawpuar inkar Tuiruang lui kamah hian Sakawrdai YMA branch pathum - Hmar Veng, Vengpui leh Chhimveng te chu zan riakin kar khat dan zelah a inchhawkin ngawrh takin an duty mhin a ni.

School Education Minister Pu Lalchhandama Ralte hi Pu C. Lalmuanpuia, MLA & Vice Chairman, Vety & Fisheries Development Board-in a mawiawm a, Darlawna Quarantine Centre an tlawh bawk a ni.