Vawiin khan Horticulture Development Board chu CM Cabinet meeting roomah an chairman Chief Minister Pu Zoramthanga hovin board hmathlir te sawihona hun an hmang. He board ah hian Pu F. Lalnunmawia chu Vice-Chairman niin Horticulture changtu Addl. CS Pu J.C. Ramthanga chu Board Secretary a ni.

Vawiin meeting-ah hian Chief Minister chuan Mizoram chu ei tura intodelh a siam chu a pawimawh hmasak ber thu sawiin, vawiin a board member thukhawm te chu board hnuaia horticulture in a huam chim thlai leh thei te hlawk zawka tharchhuak a nih theih nan leh, state mamawh tawk tharchhuah bakah hralhchhuah tur thlenga ngaihtuahna seng turin a sawm a. Mipui mamawh phuhruk thei tur chuan tam tham taka tharchhuah (large scale production) a ngaih dawn avangin mihring tha chuah a innghat lovin a theih chin chinah khawl hmang chungin (mechanization), a kalphungah pawh privatization ang zawnga kalpui tur a nih thu a sawi.

Vawiin meeting-ah hian horticulture board hmalakna tur thuang hrang hrang sawiho niin, mihring hriselna atana pawikhawih thei chemical fertilizer ah innghat lova organic fertilizer a leitha mamawhna zawng zawng phuhruk thei tura hmalakna siam chungchang te, a hmun a zira thlai leh thei chin tur bithliah te, tharchhuah sa dahthatna tur leh hnianghnar taka tui hman tur a awm reng theih nana fur ruahtui khawlna tur leh semchhuah dan tur leh adangte sawiho a ni.

Vawiin meeting-ah hian Planning Board Vice-Chairman Pu H. Rammawi leh Adviser to CM Pu C. Lalramzauva te an tel bawk.