Human Resource Development Board chu vawiin khan Chief Minister Pu Zoramthanga hovin CM Cabinet Meeting Room-ah Board hmathlir sawiho a ni. Human Resource Development Board ah hian School Education Minister Pu Lalchhandama Ralte chu Chairman a ni a,  Lengteng Constituency MLA Pu L. Thangmawia chu Vice-Chairman niin School Education Secretary chu Board Secretary a ni.

Chief Minister chuan Mizoramin hmasawn tura malsawmna a dawn hrang hrang zingah mihring theihna - human resource chu a neih that hle thu leh, a tihhmasawn kawngah pawh ngaihtuahna seng a fimkhur taka hma lak a tul thu sawiin, chumi atan chuan zirna tihhmasawn a pawimawh thu a sawi. Chutihrual chuan zirna chu sawrkar emaw private company hnuaia inhlawhna hmuh theihna tura qualification inpekchhuahna tur chauh a nih loh thu sawiin, mihring thiamna leh theihna tihhmasawn a, mi remhria siamchhuahna tur a nih zawk thu sawiin, kawng hrang hranga mihring thiamna leh theihna te tihhmasawn chu human resource development chuan a tum tur thu a sawi. Board hmalakna hnuaiah hian nunkawng tha zawh tura inkaihhruaina te, Mizo tawng humhalh leh inzirtirna leh inphochhuahna te pawh a huam tel theih thu a sawi bawk.

School Education Minister chuan Human Resource Development  Board chuan kawng enkim a mihring theihna tihhmasawn chu a hna a nih avangin board hmabak chu chona nasa tak a nih thu sawiin, chet lak dan tur duan hunah pawh member te thahnemngai taka an ngaihtuahna seng turin a sawm a. Tuna HSSLC result leh NEET result kan hmuh atang te in leh central service lama tling kan tlem tak dan atang hian hmasawn kan mamawh zia a lang a ni, a ti.

Board Vice Chairman Pu L. Thangmawia chuan zirna tihhmasawn kawngah hian coaching class tha siam te,
Faculty training institute thuamthat te,Private zirna in te nena in thawhhona tha zawk neih te, zirlai hostel tha siam te,Elementary education thuamthat leh a dangte chu ngaihpawimawh a nih thu a sawi.

Vawiin meeting ah hian Board member te bakah State Planning Board Vice Chairman Pu H. Rammawi leh Adviser to CM Pu C. Lalramzauva leh School Education leh Higher & Technical Education a hotute an tel a hi.

Attachment

  • Loading attachment...