Save Chite Lui Coordination Committee (SCLCC) buatsaih mipuite hnenah Chite Lui chhanchhuah leh humhalh a tulzia inzirtirna atana hmanraw pakhat, Chite Lui thlalak intihsiakna #SAVECHITELUICLICKS a lawmman dawngtute puanna leh lawmman semna inkhawm chu August 13, 2019 (Thawhlehni) chawhma dar 11:00 khan Chief Secretary Conference Room, MINECO-ah neih a ni a. Pu Lalnunmawia Chuaungo, Chief Secretary kaihhruai inkhawmah hian lawmman dawngtute hnenah Pu T. J. Lalnuntluanga, Environment, Forests & Climate Change Department Minister leh SCLCC Nodal Department ni bawk chuan lawmman a sem a ni.

Forest Minister Pu T. J. Lalnuntluanga chuan thusawiin Chite Lui chu amah ngei pawhin a hriatchian, a naupan laia an kal ve fo thinna, a tlangnel ve na hmun tak anih thin thu a sawi a. Luite duhawm tak, a tui pawh fim tak, a hmunhma vel pawh nuam tak anih thin thu a sawi a. Minister chuan, “Amaherawhchu, khawvel hmasawn zelah mihring kan lo pung deuh deuh va, kan lui leh tui hna duhawm tak takte chu zawi zawiin tihchhiat a lo ni chho ta mek a, Chite Lui pawh tihchhiat a ni mek a, tun dinhmun hi kan lo thleng ta a, a pawiin a lungchhiatthlak em em a ni, “ a ti a.

Minister chuan SCLCC hmalaknate chu fakin, “Thil reng rengah hlawhtling tur chuan atchilh a ngai a, Chite Lui humhimna atchilhtute hi kan ram tana mi tangkai an ni a, chawimawi an phu a, mipui ten kan tawiawm a tul a ni,” a ti a. Sorkar pawhin hemi kawnga a tihtur apiang chu tlanchhe lo va a tih zel tur thu a sawi bawk.

Inkhawm kaihruaitu Pu Lalnunmawia Chuaungo, Chief Secretary leh Chairman, SCLCC ni bawk pawhin thu sawiin SCLCC hmalakna avanga Chite Luiin hmel thar a hmuh tawh zia leh hmabak tam tak la awmte pawh phur taka umzui zel anih thu a sawi a.

SAVECHITELUICLICKS a thlalak hrang hrang lo lute chu hmuhnawm a tihzia thu sawiin, “Ngaihtuahna chhungril tak thlengin mi a khawrh chhuah sak a ni,” a ti bawk.

SAVECHITELUICLICKS thlalak intihsiakna hi category pahnihah then a ni a, Thlalak intihsiak (Thupui: Chite Lui) tih leh Selfie intihsiak (Thupui: Chite Lui leh Kei) tih a ni a. Category I (Thlalak intihsiak) hian lawmman pakhatna hian Rs. 8000/- leh Certificate a keng a, lawmman pahnihnain Rs. 4000/- leh Certificate a keng bawk a. Category II (Selfie intihsiak) ah hian lawmman pakhatna hian Rs. 5000/- leh Certificate a keng a, lawmman pahnihnain Rs. 2500/- leh Certificate a keng bawk a ni.

Category I ah hian thlalak 35 a lut a, Category II ah selfie thlalak 14 a lut bawk a. Information & Public Relations Department Director hlui Pu L. R. Sailo kaihhruaina hnuaiah Panel of Judges siam a ni a, Panel-te hian uluk taka an en hnuah heng mite hnenah hian lawman hlan anni:

Thlalak Intihsiak:     (1) Dennis Varte    (2) C. Rothangliana
Selfie Intihsiak:        (1) Kevin Malsawmtluang    2) Betsy Lalhlimpuii

Lawmman sem inkhawmah hian Forest Minister Pu T. J. Lalnuntluanga, Chief Secretary Pu Lalnunmawia Chuaungo, GAD Secretary Pu Asish Kundra, DGP Pu S. B. K. Singh, Forests Secretary Pu Ajai Saxena, PCCF Pu Liandawla, MJA President Pu Zonunsanga Khiangte leh mi sawm bikte an tel a. Govt. Aizawl College Eco Club atangin member engemawzat an tel bawk a ni.