NLUP kalphung pangngai chiang zawk leh fiah zawka hriat anih theih nan vawiin khan NLUP chungchang sawihona, 'Interactive Session on NLUP' chu I&PR Auditoriumah Chief Minister PU Lal Thanhawla hovin neih a ni.

Chief Minister chuan NLUP chu policy tha tak anih avangin a hlawhtlin ngei theihna tura hmalaknaah, hetiang intawhkhawmna siam a, sawiho fo angaih thu a sawi a.NLUP chu mi zawng zawng tan anih avangin a dawng tur dik tak ten an dawn theih nan inenpui a, kal sual thei lakah invenpui a tul thu a sawi bawk a. Hemi chungchanga thurawn pe duhte tan sorkar chu a inhawng reng a ni a ti. NLUP atang hian Zoram nuam kan siam thei a ni tiin, a hlawhtlin ngei theih nan theihpatawp kan chhuah angai a ni a ti.

Mizoram leilung hman dan, 'survey and land use planning' report-ah Dr. James L.T.Thanga, Mizoram University chuan Mizoramah NLUP atana hman theih community land chu zau tak ala awm thu sawiin, hun lokal zel turah mumal taka ram in pek anih theih dan tur zirchianna an neih thu a sawi a. Khaw te apiangah NLUP an tuipui thu leh khaw lian deuhah phunnawina a tam thu sawi bawkin, a hlawhtlinna pawh khaw lian deuh zawkte avang hian a hniam phah a rin thu a sawi a ni.

He sessionah hian line department ten power point hmangin an hmalakna te an hrilhfiah bawk a. Pu P.L.Thanga, Vice Chairman, NLUP Implementing Board in NLUP kalpui dan tlangpui a sawifiah bawk. Sawihona leh zawhna leh chhanna te neih zui nghal bawk a ni.

Sessionah hian Ministers, Parliamentary Secretaries leh MLA te an tel kim hle a, sawmbik mi engemawzah an tel bawk a ni.