No.6104/2020-2021

Aizawl. 15.10.2020: Vawiin khan Chief Minister Pu Zoramthanga hovin CM Cabinet Meeting room-ah Public Health Engineering Department hotute nen Mizorama Jal Jeevan Mission kalpui mek chungchang sawihona neih a ni a. PHE Department changtu Deputy Chief Minister Pu Tawnluia pawh a tel a ni.

Vawiin meeting-ah hian kum 2019-2020 chhunga hmalak tawhna thlirhovin, kumin kum kal mek 2020-2021 chhunga hmalaknate sawiho a ni bawk a. Jal Jeevan Mission hi India rama thingtlang khuaa chenna in tinah tui connection siam sak a, tui thianghlim 55 lpcd tal pek thin an nih theihna tura sawrkar laipui hmalakna a ni a. Nikum 2019-2020 chhung khan Mizoram chu he hmalakna hnuaiah hian state thawk tha pawl niin, sawrkar laipui atang pawhin lawmman (incentive) pek a ni a; khami kum chhunga hmalakna tur sum bithliah sak aia tam a dawn phah a ni. Kumin hian state hrang hrangte hripui leng avang te in hma an lak that theihloh thu leh, Mizoramah ngei pawh duh anga chet lak a theihloh thu sawi a ni.

Mizoram chhungah JJM kalpuina tur khua leh khawhbawk awm zat belhkhawm chu 722 a ni a. Heng zingah hian tun dinhmunah khua 78 chu chenna in tin tui connection thlun sak tawh a ni. Vawiin meeting-ah hian tun dinhmunah tui connection siam hi tui lakna awlsam chin a la nih thu tarlan a ni a. Kum lo awm leh turah chuan tui lakna harsa deuh zawkte a la awm dawn avangin chung atan chuan hmalakna thar siam tel a ngaih tur thu PHED engineer te chuan an sawi a. Hemi chungchangah hian ruahtui khawl (rainwater harvesting) lama nasa zawka hmalak pawimawh an tih thu Chief Minister leh Dy. Chief Minister chuan an sawi a ni.

JJM hnuaiah hian Village Water and Sanitation Committee (VWSC) hma lak na tur khuaah din a ni hlawm a, village level ah vek hmalakn tul awm ang te duan a ni a. District tinah Implementation Support Agency (ISA) siam bawkin, a vaiin ISA hi 12 a awm a (Siaha district ah MTP, Lawngtlai district ah YLA leh YCA, district dang zawngah YMA). Mizoram University a Civil Engineering Department te chu Third Party Inspection Agency atana thawhpui niin, anni hian hmalakna te an enfiah sak a ni.