Vawiin chawhnu khan Chief Minister Pu Lal Thanhawla hovin Chief Minister's Cabinet Meeting Room ah Mizoram khawpui hrang hrangte tana buatsaih tum mek Vantlang Thlanmual intawm ruahmanna chungchang ngaihtuahtu, High Level Committee For Common Cemetary a member-te an thu khawm.
Meeting ah hian Urban Development & Poverty Alleviation Department(UD&PA)in he thlanmual intawm a taka kalpui a nih theih nana ruahhmanna a siamte zirchian a ni a. UD&PA ruahmanna te hi chik taka bihchian leh siam that ngai lai hmuh chhuah tak te siam that a nih hnu in dan puitling siam a nih theihna tura bawhzui rel a ni.Ruahman dan chuan Common Urban Cemetary hi Aizawl khawpui ah tan hmasak tum a ni. Meeting hma a pharh tak Draft Bill hi " The Mizoram( Establishment & Maintenance of Common Cemetary) in Urban Areas Bill, 2014" a ni a. He Draft Bill hi Assembly session a pharh a nih hmain Law & Judicial Department in a zirchiang leh phawt ang.
High Level Committee For Common Cemetary kaihruaitu Chief Minister Pu Lal Thanhawla chuan vantlang tana thlanmual intawm neih chu pawimawh a tih thu leh kum 1992 atang tawh khan hemi chungchanga ngaihtuahna a lo sen thin tawh thu a sawi a. Mipui chenna tur hmunawl alo tam zawk nan leh vantlang nuphung, eizawnna leh khawsakdan lo inthlak danglam zelah Vantlang thlanmual intawm neih chu a tul tawh hrim hrima a ngaih thu a sawi a. Chief Minister chuan, "Mipui kan pung zela ram zau zawng a thang ve chuang silova chenna tur hmunruakte remchang mamawhna a lo tam telh telh bawk si nen kan neihchhun hmunawl te hi awmze tak leh tangkai taka kan hman chhoh zel a ngai tawh a ni", a ti a. Vantlang thlanmual intawm chu Mizoram chhunga District hrang hranga khawlian deuhvah te chuan siam a tul chho zel tura a ngaih thu a sawi bawk a ni.
UD&PA Draft Rule sawi hawngtu UD&PA Minister Pu Zodintluanga chuan Vantlang thlanmual hmunhma an hmuh tawh thu a sawiin sakhuanna thurin vanga ruang halral-na kalpuite tan Sairang ram ah Crematory sak a nih tawh thu a tarlang a. Sawrkar ruahman dan anga vantlang thlanmual intawm hmunhma hi siam fel thuai tura hmalak a ni anga, thlanmual enkawltu tur management society leh committee pawimawh te pawh a tul anga siam a ni ang a ti a ni.
Vawiin a neih tak, High Level Committee For Common Cemetary meeting ah hian Parliamentary Secretary Lt.Col(Rtd) Z.S. Zuala, Pu Vanlalzawma, MLA, Pu Lalthanliana, MLA bak ah Sawrkar mi pawimawh tak tak te leh NGO hruaitute an tel a ni.
