Vawiin tlai khan Chief Minister Pu Lal Thanhawla chuan School Education Department hotute chu Cabinet Meeting Room ah a kawm a. He hunah hian Mizoram chhunga Education in chak zawka hma a sawn theih na tura School Education Department hotute rawtna leh ruahmanna chhawpchhuahte zirchian a ni. School Education hotute hi Parliamentary Secretary Pu Joseph Lalhimpuia'n a hova, Meeting ah hian Education Department hotu-te chuan an rawtna hrang hrang te sawi zauvin chung rawtna tihpuitlin a nih theihna nia an hriat te an sawi a ni.

Chief Minister Pu Lal Thanhawla chuan Department hrang hranga Secretary-te chu ngen an nih anga rawtna awmze nei leh Mizoram hmasawnna tur kawng hrang hrang an hriat te tha taka an thehluh avanga lawmawm a tih thu a sawi a. Sawrkar hnathawk tam zawk an hnathawh chhan mipui rawngbawlna hrelo te pawh an in siam that a ngai a ni tiin sawrkar hna chu rawngbawlna a nih thu a sawi a. Sawkar hnathawk zingah Mipui rawngbawltu a nihna hrelo chuan a hna a hrelo a ni a ti a. Sawrkar atanga hlawhla chuan a hlawh lak phu tawk ram tan hna a thawk em tih a in zawh fo a ngai a ni a ti. Kutlinglova sum lakluh hian hmun dang ang bawkin Mizoram pawh min tibuai ber a ni a ti a.

Education Department chu mipuite zirna leh thiamna petu a nih ah duhtawk mai lovin dikna leh taihmakna ah pawh hmahruaitu ni turin tan a lak a ngai a ni a ti.School Education Department hmalak mek te leh an hmasawnna te leh Department anga thawm chak an ngaihna lai te Pu Joseph Lalhimpuia, Parliamentary Secretary, Education, Industries,etc.,chuan a tarlang hmasa a. Education Department hmalakna ti chak tura ruahmanna an siam te chu tih theih loh tur duhthusam nilovin SSA leh RMSA ah te pawh an kalpui theih a nih thu a sawi a. An hmachhawp pawimawh zingah School Education, SSA leh RMSA statistics inmil lo siam leh School Inspection Team zahawm tak National Accreditation Council(NAAC) duanga siam rawtna te a tel a ni.

School Education rawtna thehluh te hi School Education Secretary Pu R.Lalvena'n a sawi zauva. Rawtna zingah ah Transfer & Posting of Teacher awmze nei zawka kalpui anih theih nan Sikul pakhat a zirtirna awm zat tur bituk, Post nen chawpa Transfer tihtawp dan tur ruahmanna, District leh sub-division pakhat atana zirtirtu lak tawh district dang emaw sub-division danga insawn thei lo tura ruahmanna siam te leh Education Department leh a hnuaia awm SSA leh RMSA te tana data inang hman te a tel a ni.