1177/2023-2024

Aizawl, July ni 18, 2023: Chief Minister Pu Zoramthanga hovin vawiin khan CM Conference Hall-ah Vairengte-Sairang inkara national highway siam hna thawh turah land acquisition chungchanga sawiho ngaite sawia ngaihtuahho a ni.

Vawiin meeting-ah hian NHIDCL in Vairengte leh Sairang inkara 4-lane kawng siam hna an thawh tan theihna tura harsatna awm thenkhat leh sutkian a nih theih dan te sawiho a ni a. Stakeholder hrang hrang te'n an ngaihdan leh harsatna tawhte sawi a ni a, NHIDCL lamin clearance an neih theih nan a dilna an lo thehluh tawh hrang hrangte thlirho niin, hna thawh thuai an beisei thu an sawi hlawm a ni.

Vawiin meeting-ah hian Advisor to Chief Minister Pu C. Lalramzauva, Principal Secretary Forest Dept. Pu RK Singh, PWD Secretary Pu K. Lalthawmmawia, Kolasib District administration leh Competent Authority for Land Acquisition (CALA) aiawhte, 4-Lane paltlang tur Kolasib district chhung khaw hrang hrang atanga ram neitu aiawh te, tlawmngai pawl leh khawtlang hruaitu aiawh, etc. an tel a ni.