1176/2023-2024

Kolasib dated 18th July 2023: Vawiin chawhnu khan DC Conference Hall, Kolasibah Khuangpuilam, Diakkawn, Rengtekawn leh Vairengte III Village Council inthlanna atan a hman tur Final Village Council Electoral Roll tlangzarh a ni a. Pu John LT Sanga, Deputy Commissioner chuan VC Roll tlangzarhna neiin Political party hrang hrang aiawhte leh Electoral Registration Officer leh Assistant Electoral Registration Officer-te hnen ah VC Roll hi a hlan nghal bawk a ni.

Pu John LT Sanga, Deputy Commissioner chuan inthlanna felfai kalpui a nih theih nan Electoral Roll tha leh rintlak buatsaih a tul thu sawiin hemi kawng a thawktute zawng zawng fakawm a tih thu a sawi a. Mipui aiawh a rorel tur thlan chhuahna hna langtlang leh felfai tak a awm theih nan Sawrkar a mawhphurtute bak ah Political party hruaitute, Tlawmngai pawl, Kohhran leh khawtlang hruaitute inkar ah thawhhona tha neih a pawimawh thu a sawi.

Pi Christina Lalmuanzuali, Election Officer tarlan danin Final Village Council Electoral Roll-ah hian Khuangpuilamah voter 1166 an awm a, mipa 558 leh hmeichhia 608 an ni a. Diakkawnah voter 2730 awmin mipa 1242 leh hmeichhia 1488 an awm a. Rengtekawnah voter 1059 awmin mipa 525 leh hmeichhia 534 an awm a. Vairengteah iii ah voter 890 awmin mipa 431 leh hmeichhia 459 an awm bawk a ni. Village Council inthlanna atan a Roll buatsaih ah hian Schedule Tribe voter-te chauh ziahluh an nih avangin June ni 26, 2023-a Draft Roll tlangzarh nen khaikhinin voter 28-in an kiam thu tarlan a ni a. Inthlan hun hi State Election Commission thuchhuak ngaihchan a nih tur thu EO chuan a sawi bawk a ni.