No.2471/2020-2020

Aizawl the 26th June, 2020: Chief Minister Pu Zoramthanga kaihhruaiin vawiin khan tun hnaia Mizoram khawchhak lama lirnghing in khaw hrang hrang a nghawng dan te thlir hona leh, lirnghing na zawk lo thlen thulha inpuahchah theih dan tur te sawihona neih a ni. He meeting, CM office conference hall-a neihah hian Health Minister Dr. R. Lalthangliana; Home, DM&R Minister Pu Lalchamliana; FCS&CS Minister Pu K. Lalrinliana leh East Tuipui bialtu MLA Pu Ramthanmawia te an tel a ni.

Chief Minister chuan tun hnaiah hun reilote chhunga tum engemawzat Mizoram khawchhak lam khuate chu lirnghing in a sawi avanga lungmuang a awm theilo, mahni in ngeiah pawh mu ngamlova an awm phah chu hrehawm a tihpui thu a sawi a. Chutihrual chuan nunna chan an awm loh avang leh hriselna leh supply kaihhnawih chhiatna a thleng lo chu lawmawm a tih thu a sawi a.

Chief Minister chuan bialtu MLA te leh Geology & Mineral Resources leh university atanga mithiamten rang taka a hmun a thil awm dan ngaihven a an han kal nghal chu lawmawm a ti a. Lirnghing in a nghawng khua mipuiten tun maia an mamawh nghal tur ang chi te chu Disaster Management & Rehabilitation Department kaltlangin ngaihtuahsak zui nghal thuai turin department hotute a hrilh bawk.

Vawiin meeting-ah hian lirnghing in chenna in, biakin, hall leh structure dangte a tihchhiat dan thlirho a ni a. DM&R Department leh MIRSAC atangin mithiam ten Mizoram a lirnghing thlen theih dan leh nghawng a neih theih dan hrang hrang te powerpoint presentation hmangin an entir bawk.

Vawiin meeting-ah hian Chief Secretary, DIG leh department hrang hranga hotu dangte an tel a ni.