No.2472/2020-2020

Lunglei District mi leh sa state pawn atanga lo haw, government quarantine facility, community quarantine Center leh home quarantine-a khung hran mek zat chu vawiin chhun dar 12:00 thleng khan mi 210 a ni a. Hengte hi sawrkar Quarantine Centre/DCHC/CCC-ah mi 137, Community Quarantine (kohhran hall) ah mi 55 leh mahni ina inkhunghran (Home Quarantine) mi 18 an ni.

Quarantine period hmang zo tawh, RT-PCR result chhuaka negative bawk te chu Quarantine Centre atanga chhuah phalna pek mek zel niin vawiin pawh khan Lunglei District Quarantine Centre hrang hrang atangin mi 129 zet an chhuak a. Vawiina chhuak ta te zingah hian JNV Pukpui Quarantine Facility atangin Mumbai atanga lo haw mi 58 leh DIET Lunglei Quarantine Facility atangin Delhi leh hmun dang atanga lo haw mi 44 te an tel a ni. Heng Quarantine Centre-ah te hian thlahna programme hman niin Quarantine hun hmang zo ta te hi Medical Officer in charge ten Declaration Certificate an hlan a ni. An room chhuahsan te Disinfection Team ten kap thianghlim vek turin hma an la nghal bawk a ni.

Quarantine Centre atanga chhuak te hi an chhuah atanga ni 7 chhung chu mahni uluk taka invawng (self-monitoring) tura chah niin mask tha taka vuah, social distancing tha taka zawm leh kut silfai fo te bakah hriselna kawngah mahni theuh invawn uluk zui zel tur leh tuallaiah leng chhuak lo tur leh in lamah inleng kawm lo tura hriattir an ni.